सिद्धटेक : सिद्धटेक (ता. कर्जत) येथील शासकीय भक्तनिवास ठेक्याची मुदत साडेतीन वर्षांपूर्वीच संपली आहे. तेव्हापासून भक्तनिवास बंदच आहे. निविदा प्रक्रिया पूर्ण होत नसल्याने शासनाचा लाखो रुपयांचा महसूलही बुडाला आहे. तसेच भाविकांचीही गैरसोय होत असून तिसरी निविदा प्रक्रियाही रद्द करण्यात आली आहे.
अष्टविनायकांपैकी एक असलेल्या सिद्धटेक येथील भक्तनिवासाची डिसेंबर २०१७ पर्यंत मागील ठेक्याची मुदत होती. तेव्हापासून आतापर्यंत निविदा प्रक्रियेचा गोंधळ चालू आहे. आतापर्यंत तीन वेळा निविदा काढल्या होत्या. परंतु, वार्षिक रक्कम कमी येत असल्याने निविदा प्रक्रियाच रद्द केली आहे.
गणेश उत्सव, दिवाळी, नाताळ सुट्ट्यांमधील भाविकांची गर्दी लक्षात घेता प्रशासन याबाबत काही निर्णय घेणार आहे की नाही, असा प्रश्न ग्रामस्थ करीत आहेत. अगोदरच बंद असलेले बहुउद्देशीय सभागृह यामध्ये आता भक्तनिवास व व्यापारी गाळे यांची भर पडल्याने कोट्यवधींच्या वास्तू बंद राहून त्यांची दुरवस्था होत आहे. अष्टविनायक यात्रा करणाऱ्या भाविकांची संख्या लक्षणीय आहे. यात्रेदरम्यान त्यांना येथे राहण्याची सुविधा मिळणे आवश्यक आहे. खासगी भक्तनिवासाचे भाडे अनेक भाविकांना न परवडणारे असते. चिंचवड देवस्थान ट्रस्टचे भक्तनिवास अपुरे आहे. भाविकांची गैरसोय होत असल्याने या वास्तू म्हणजे असून अडचण नसून खोळंबा अशी स्थिती झाली आहे.
-----
भक्तनिवास साडेतीन वर्षांपासून बंद असल्याने भाविकांचे हाल होत आहेत. कोट्यवधींच्या वास्तूंची वापराविना दुरवस्था होत आहे. वार्षिक कमी रकमेवर का होईना कोणाला तरी ठेका देऊन भक्तनिवास, बहुउद्देशीय सभागृह सुरू करणे आवश्यक आहे.
-पल्लवी सुजित गायकवाड, योगिता अमोल भोसले,
सरपंच, उपसरपंच, सिद्धटेक-बेर्डी
----
२१ सिद्धटेक
सिद्धटेक येथील बंद असलेले कोट्यवधी खर्चून बांधलेले भक्तनिवास.