साहेब, आमच्या भागात मोबाईल केव्हा वाजणार?

राजूर : जुन्नरच्या आमदार, खासदारांनी अकोले तालुक्यातील फोफसंडी या दुर्गम भागात मोबाईलची रेंज आणली. आता आमच्याच अकोले तालुक्यातील आमदार, खासदारांनी आदिवासी दुर्गम भागातील कुमशेत, पाचनई, आंबित व परिसरात मोबाईल नेटवर्क उपलब्ध करून द्यावे, अशी मागणी या भागातील सरपंच आणि ग्रामस्थांमधून होत आहे.

अकोले तालुक्यातील आदिवासी भागात सुरू असलेल्या मोबाईल नेटवर्किंगच्या प्रश्नामुळे या परिसरातील विद्यार्थ्यांचा ऑनलाईन अभ्यासाचा खेळखंडोबा होत आहे. यावर लोकमत सातत्याने आवाज उठवत आहे. अकोले तालुक्यातील फोफसंडी येथील ऑनलाईन अभ्यासाची वस्तुस्थिती मांडणारे वृत्त काही दिवसांपूर्वी लोकमतमध्ये प्रकाशित झाले होते. या वृत्ताची दखल घेत जुन्नर (जि. पुणे) येथील आमदार वल्लभ बेनके आणि खासदार डॉ. अमोल कोल्हे यांनी फोफसंडी या दुर्गम भागात मोबाईल नेटवर्क उपलब्ध करून दिले. यानंतर आता किमान आमच्या तालुक्यातील आमदार डॉ. किरण लहामटे आणि खासदार सदाशिव लोखंडे यांनी कुमशेत, पाचनई, धामनवन, शिरपुंजे, आंबित व परिसरातील गावांमध्ये मोबाईल नेटवर्क उपलब्ध करून देण्यासाठी पुढाकार घ्यावा, अशी मागणी जोर धरू लागली आहे.

................

अभ्यासाचा प्रश्न मिटविण्यासाठी एवढे कराल का?

फोफसंडीसारख्या अतिदुर्गम भागात मोबाईलची रेंज आली. ही सुविधा उपलब्ध करून देण्यासाठी जुन्नरच्या आमदार, खासदारांनी प्रयत्न केले. आता आमच्या आमदार, खासदारांनी दुर्गम आदिवासी भागातही अशी मोबाईल रेंज आणावी. यामुळे आमच्या लेकरांना ऑनलाईन अभ्यासासाठी डोंगराच्या पायवाटा तुडवाव्या लागणार नाहीत. आमचे आमदार, खासदार मुलांच्या शिक्षणासाठी किमान एवढे तरी काम कराल का, असा सवाल कुमशेतचे सरपंच सयाजी असवले, पाचनईचे सरपंच पर्वताबाई घोगरे व इतर गावच्या सरपंच यांनी केला आहे.