लोकमत न्यूज नेटवर्क
पळवे
: पारनेर तालुक्यातील १३०० लोकसंख्या असलेले पळवे बुद्रुक हे गाव कोरोना मुक्तीकडे वाटचाल करत आहे. काॅन्टॅक्ट ट्रेसींग आणि ग्राम दक्षता समितीने संशयीत तपासणीमध्ये सातत्य ठेवल्याने मेअखेर गावातील केवळ दोन रुग्णांवर उपचार सुरू असून, नव्याने एकही रुग्ण गावात आढळून आलेला नाही, असे ग्रामसेवक गणेश घुले यांनी सांगितले.
शहरातील काेरोना गावखेड्यात पोहाेचल्यानंतर पळवे बुद्रुक गावात एप्रिल महिन्यात ३२ रुग्ण आढळले होते. ग्राम दक्षता समितीने ज्या घरात रुग्ण आढळेल, त्यामधील व शेजारील २० जणांची तपासणी करण्याचे उद्दिष्ट ठेवले होते. प्रत्येकाची तपासणी करून कोरोना संख्या वाढू न देण्यावर समितीने भर दिला. लक्षणे दिसताच तपासणी करणे आणि उपचार घेणे असे नियोजन करण्यात आले. त्यामुळे मे महिन्यात कोरोना रुग्णांची संख्या अवघी दहावर आली. मे अखेर ती फक्त दोन रुग्णांवर उपचार सुरू होते. आता मागील आठवड्यात गावात एकही रुग्ण न आढळल्याने ग्रामस्थांनी सुटकेचा निश्वास सोडला, तसेच ग्राम दक्षता समितीच्या या नियोजनाचे कौतुक केले. या कामी दक्षता समितीच्या अध्यक्ष सरपंच तेजस्वीनी सुरेश कळमकर, उपसरपंच शिवाजी पळसकर, आशा सेविका नंदा पळसकर, सदस्य गंगाराम कळमकर, ग्रामसेवक गणेश घुले, कर्मचारी बीपीन जाधव यांनी परिश्रम घेतले.
..........
गावात ८० टक्के लसीकरण
मंगळवारी येथील प्राथमिक आरोग्य केंद्राच्यावतीने देण्यात आलेल्या ६० कोव्हिशिल्ड लसीचे पळवे बुद्रुक येथील उपकेंद्रात लसीकरण करण्यात आले. गावोगावी लसीकरण पोहोचत असल्याने गर्दीचे प्रमाण कमी होऊन संसर्ग रोखण्यास मदत होत आहे. पळवे बुद्रुकमध्ये ४५ वर्षे वयापुढील ८० टक्के नागरिकांचे लसीकरण पूर्ण झाले आहे, असे वैद्यकीय अधिकारी डॉ. सुदाम बागल यांनी सांगितले.