नगररचना विभागातील सहा मठाधिपती हलविले

----------------

लोकमत न्यूज नेटवर्क

अहमदनगर : महापालिकेतील नगरचना विभागात वर्षानुवर्षे एकाच टेबलावर काम करणाऱ्या कर्मचाऱ्यांच्या एकाधिकारशाहीला आयुक्त शंकर गोरे यांनी अखेर सुरुंग लावला. पहिल्याच दिवशी नगरचनामधील ६, तर अन्य विभागातील ५ अशा ११ कर्मचाऱ्यांची उचलबांगडी करण्यात आली आहे. मनपा आयुक्त गोरे यांच्या घेतलेल्या धाडसी निर्णयाचे सर्वच स्तरातून स्वागत होत आहे.

‘लोकमत’ने महापालिकेतील एकाधिकारशाही या मथळ्याखाली वर्षानुवर्षे एकाच टेबलावर काम करणाऱ्या कर्मचाऱ्यांचा भांडाफोड करणारी पाच भागांची वृत्त मालिका प्रकाशित केली होती. या मालिकेवर प्रतिक्रिया देताना आयुक्त गोरे यांनी २० टक्के कर्मचाऱ्यांच्या बदल्या करणार असल्याचे सांगितले होते. त्यानुसार गोरे यांनी नगररचना विभागापासून सोमवारी बदल्यांना सुरुवात केली. नगररचनाचे सहायक संचालक राम चारठणकर यांच्यासह अधिकाऱ्यांची आयुक्तांनी बैठक घेतली. दुपारी सुरू झालेली ही बैठक सायंकाळी सहा वाजेपर्यंत सुरू होती. आयुक्त गोरे यांनीही बैठकीत आक्रमक पवित्रा घेतला. नगररचना विभागातील सहा कर्मचाऱ्यांच्या बदल्यांच्या प्रस्तावावर स्वाक्षरी करत तत्काळ हजर होण्याचा आदेश दिला आहे. तसेच झालेली बदली रद्द करण्याबाबत कुठलाही दबाव आणण्याचा प्रयत्न केल्यास महापालिका अधिनियम कलम ५६ नुसार कारवाई करण्यात येईल, असा इशाराही गोरे यांनी दिला आहे. तसेच बदल्या करताना कामकाज ठप्प होणार नाही, याचीही काळजी घेण्यात येत असून, कामाच्या सोयीनुसार बदल्या करण्यात येणार असल्याचे सांगण्यात आले.

महापालिकेतील नगररचना बांधकाम, पाणीपुरवठा, विद्युत, आस्थापना, यासह अन्य विभागातील कर्मचारी वर्षानुवर्षे एकाच टेबलावर काम करत आहेत. त्यामुळे या कर्मचाऱ्यांची एकाधिकारशाही निर्माण झाली आहे. त्याचा परिणाम विकासकामांवर होत असून, नागरिकांनाही छोट्या छोट्या कामांसाठी महापालिकेत अक्षरश: हेलपाटे मारावे लागतात. ज्येष्ठ नागरिकांसह सेवानिवृत्त कर्मचाऱ्यांनाही महापालिकेतील कर्मचाऱ्यांबाबतचा अनुभव वाईट आहे.

.........

नगररचनातील यांच्या झाल्या बदल्या

नगररचना विभागातील ट्रेसर सतीश दारकुंडे यांची नगररचना विभागातून बांधकाम विभागात बदली करण्यात आली आहे. लिपिक व टंकलेखक संजय चव्हाण यांची नगररचना विभागातून प्रभाग समिती क्रमांक- ४ मध्ये बदली करण्यात आली आहे. त्यांच्या जागी प्रभाग समिती क्रमांक चारमधील शिवराम गावांडे यांची नियुक्ती करण्यात आली आहे. लिपिक सुनील खलचे यांची नगररचना विभागातून सावेडी प्रभाग कार्यालयात बदली करण्यात आली आहे. खलचे यांच्या जागी सावेडी प्रभाग कार्यालयातील देवराम पिचड यांची नियुक्ती करण्यात आली आहे. लिपिक मोहन ढवळे यांची नगररचना विभागातून स्थानिक संस्था कर विभागात बदली करण्यात आली आहे. त्यांच्या जागी स्थानिक संस्था कर विभागातील किशोर जाधव यांची नियुक्ती करण्यात आली आहे. लिपिक राजेंद्र फडतारे यांची नगररचना विभागातून प्रभाग समिती क्रमांक- ३ मध्ये बदली करण्यात आली आहे. त्यांच्या जागी प्रभाग समिती क्रमांक-३ मधील राहुल झिंजे यांची नियुक्ती करण्यात आली आहे. शिपाई राधा आहेर यांची नगररचना विभागातून माहिती सुविधा केंद्रात बदली करण्यात आली आहे. त्यांच्या जागी माहिती सुविधा केंद्रातील शिपाई पदावर कार्यरत असलेल्या उज्ज्वला महारपुडे यांची नियुक्ती करण्यात आली आहे.

...........

सर्व विभागांचा आढावा घेऊन कामाच्या सोयीनुसार बदल्या

महापालिकेतील वर्ग ३ आणि ४ मधील कर्मचाऱ्यांच्या बदल्या करण्यात येणार आहेत. सोमवारी नगररचना विभागातील कामकाजाचा आढावा घेऊन सहा कर्मचाऱ्यांच्या अन्य विभागांत बदल्या करण्यात आल्या आहेत. अन्य बांधकाम, पाणीपुरवठा, विद्युत, आस्थापना, सामान्य प्रशासन आदी विभागांचा आढावा घेऊन कामाच्या सोयीनुसार बदल्या करण्यात येणार आहेत. बदल्या करताना कामकाज ठप्प होणार नाही, याची काळजी घेण्यात येत आहे.

- शंकर गोरे, आयुक्त, महापालिका

....