लोकमत न्यूज नेटवर्क
अहमदनगर : सहकारी संस्थांच्या सहा टप्प्यात निवडणूका घेण्याचा निर्णय घेण्यात आला असून, पहिल्या टप्प्यात जिल्ह्यातील १५६ सहकारी संस्थांच्या निवडणूकांचा पुढील टप्पा सुरू करण्यात आला आहे. त्यामुळे ग्रामपंचायतींच्या निवडणुकीचा धुराळा खाली बसल्यानंतर जिल्हयात सहकारी संस्थांच्या निवडणुकांचा बिगुल वाजणार आहे.
कोरोनाच्या पार्श्वभूमीवर करण्यात आलेल्या लॉकडाऊनमुळे सहकारी संस्थांच्या निवडणुका यापूर्वी तीनवेळा पुढे ढकलण्यात आल्या होत्या. १ जानेवारी ते ३१ डिसेंबर २०२० या काळात मुदत संपलेल्या जिल्ह्यातील सहकारी संस्थांची संख्या १ हजार ६८६ इतकी आहे. यापैकी न्यायालयाच्या आदेशाने १७ सहकारी संस्थांच्या निवडणुकांची प्रक्रिया सुरू करण्यात आलेली आहे. उर्वरित ज्या सहकारी संस्थांची निवडणूक प्रक्रिया सुरू करण्यात आली आहे, त्या सहकारी संस्थांची पहिल्या टप्प्यात निवडणुका घेण्याचा आदेश राज्य सहकारी प्राधिकरणाने दिला आहे. त्यानुसार येथील उपजिल्हा निबंधक कार्यालयाकडून मतदार याद्या तयार करण्यात आलेल्या १५६ सहकारी संस्थांच्या निवडणूका ज्या टप्प्यावर थांबल्या होत्या, त्या टप्प्यापासून सुरू निवडणूक प्रक्रिया सुरू केली आहे. निवडणूक असलेल्या बहुतांश सहकारी संस्थांच्या मदारयाद्या अंतिम करण्यात येईल. त्यानंतर निवडणुकीचा कार्यक्रम प्रशासनाकडून जाहीर करण्यात येणार आहे.
जिल्ह्यातील मागीलवर्षी मुदत संपलेल्या सहकारी संस्था १ हजार ८६ इतक्यात आहेत. परंतु, लॉकडाऊनमुळे या निवडणूका पुढे ढकलण्यात आल्या होत्या. त्यामुळे मागीलवर्षी मुदत संपलेल्या सहकारी संस्थांच्या निवडणूका चालू वर्षात होत आहेत. त्यात चालू वर्षात मुदत संपणाऱ्या सहकारी संस्थांची संख्या १ हजार २९१ इतकी आहे. त्यामुळे दोन्ही वर्षांत मुदत संपलेल्या सहकारी संस्थांच्या निवडणूका एकाच वर्षात होणार आहेत. जिल्ह्यात सध्या ग्रामपंचायत निवडणुकांची रणधुमाळी सुरू आहे. ग्रामपंचायतींच्या निवडणुकांपाठोपाठ सहकारी संस्थांच्या निवडणूका होणार असल्याने ग्रामीण भागातील राजकारण पुन्हा ढवळून निघणार आहे.
...
जिल्हा बँकेसाठी दिग्विजय आहेर निवडणूक अधिकारी
जिल्हा मध्यवर्ती सहकारी बँकेच्या संचालक मंडळाच्या पंचवार्षिक निवडणूकीसाठी निवडणूक निर्णय अधिकारी म्हणून जिल्हा उपनिबंधक दिग्विजय आहेर यांची नियुक्ती करण्यात आली आहे. जिल्हा सहकारी बँकेच्या निवडणूकीसाठीची अंतिम मतदारयादी प्रसिध्द करण्यात आली आहे. अंतिम मतदारयादी जाहीर झाल्यानंतर साधारण १५ दिवसांत निवडणूक कार्यक्रम जाहीर केला जातो. जिल्हा बँकेची मतदारयादी जाहाीर होऊन आठ दिवस उलटून गेले असून, पुढील आठवड्यात बँकेच्या निवडणूकीचा कार्यक्रम जाहीर होण्याची शक्यता आहे. त्यामुळे फेब्रुवारी अखेरीस संचालक मंडळांच्या निवडणूकीसाठी मतदान होण्यची शक्यता आहे. बँकेच्या २१ जागांसाठी ही निवडणूक होत असून, या निवडणूकीकडे जिल्ह्यातील राजकीय वर्तूळाचे लक्ष लागून आहे.