आमदार संजय गायकवाड यांच्याविरोधात 'वंचित' आक्रमक! शेवगावात धडकला भव्य मोर्चा; गुन्हा दाखल करण्याची मागणी

हा मोर्चा सकाळी ११ वाजता शेवगाव शहरातील आंबेडकर चौकातून सुरू झाला. मोठ्या संख्येने कार्यकर्ते आणि पदाधिकारी हातात फलक घेऊन या आंदोलनात सहभागी झाले होते. घोषणाबाजीने संपूर्ण परिसर दणाणून गेला होता.

आमदार संजय गायकवाड यांनी केलेल्या वादग्रस्त वक्तव्याचे पडसाद आता राज्यात उमटत आहेत. याच पार्श्वभूमीवर, अहिल्यानगर जिल्ह्यातील शेवगाव येथे वंचित बहुजन आघाडीच्या वतीने भव्य निषेध मोर्चा काढण्यात आला. वादग्रस्त वक्तव्य करणाऱ्या आमदारांवर तातडीने गुन्हा दाखल करावा, अशी आक्रमक मागणी यावेळी करण्यात आली.

हा मोर्चा सकाळी ११ वाजता शेवगाव शहरातील आंबेडकर चौकातून सुरू झाला. मोठ्या संख्येने कार्यकर्ते आणि पदाधिकारी हातात फलक घेऊन या आंदोलनात सहभागी झाले होते. घोषणाबाजीने संपूर्ण परिसर दणाणून गेला होता. हा मोर्चा पुढे शेवगाव पोलीस ठाण्यावर धडकला.

वंचित बहुजन आघाडीचे राज्य उपाध्यक्ष प्रा. किसन चव्हाण यांच्या नेतृत्वाखाली हे आंदोलन पार पडले. आंदोलकांनी पोलीस प्रशासनाला निवेदन सादर करून, महापुरुषांचा अपमान करणाऱ्यांवर कडक कायदेशीर कारवाई करण्याची मागणी केली. शेवगावचे पोलीस निरीक्षक संतोष मुटकुळे यांनी आंदोलकांचे निवेदन स्वीकारले असून, कायदा-सुव्यवस्थेच्या दृष्टीने परिसरात मोठा पोलीस बंदोबस्त तैनात करण्यात आला होता.