रोहित टेके
लोकमत न्यूज नेटवर्क
कोपरगाव : कोरोनामुळे संपूर्ण जनजीवन विस्कळीत झाले आहे. त्यातच या काळात खासगी क्षेत्रात काम करणाऱ्या अनेकांच्या नोकऱ्या गेल्या. काहींचे पगार कमी झाले, तर बाजारपेठाही उद्ध्वस्त झाल्यामुळे घराघरात किचनपासून कटिंगपर्यंत कॉस्ट कटिंग सुरू आहे.
गेल्या दीड वर्षात वैश्विक कोरोनामुळे नागरिकांना सार्वजनिकरीत्या घराबाहेर पडण्यासाठी मर्यादा आल्या. त्यामुळे बाजारपेठेवर देखील गंडांतर आले. यातून उद्योग, व्यवसायावर देखील गंडांतर आले. चरितार्थ चालविणाऱ्या कुटुंबप्रमुखाच्या नोकऱ्या गेल्या तर काहींच्या पगारात कपात झाली. त्यातून मुलांच्या शैक्षणिक खर्चासह दैनंदिन प्रापंचिक गाडा चालवताना गृहिणींना मात्र खूप कसरत करावी लागत आहे. घरखर्चातील अनेक खर्चाला फाटा देत महिन्याची खर्चाची जुळवाजुळव करावी लागत आहे, तर नोकरी गेलेल्या कुटुंबांतील महिला घरगुती व्यवसाय ज्यामध्ये केक तयार करून विक्री करणे, भाजीपाला विक्री करणे यासह छोटे छोटे व्यवसाय करून आपल्या कुटुंबाचा गाडा चालविण्याचे काम करीत आहेत.
...............
अशी केली कॉस्ट कटिंग !
१) घरातील कपडे घरीच इस्त्री करणे.
२) फास्टफूड विकत घेणे टाळणे.
३) दररोजचा पाणीपुरीचा खर्च टाळणे.
४) भिसी पार्ट्या बंद.
५ ) हॉटेलचे जेवण बंद.
६) पर्यटनावरील खर्चावर मर्यादा.
७) अनावश्यक खरेदी बंद.
८) विजेच्या उपकरणाचा मर्यादित वापर.
९) मोलकरीण करीत असलेले काम स्वतःच करणे.
१०) किराणा यादीतील अनावश्यक वस्तूंची कपात.
११) दाढी-कटिंग घरीच करणे.
................
माझे पती एका खासगी संस्थेत नोकरीला आहेत. कोरोनापूर्वी येणाऱ्या पगारात आमच्या कुटुंबाचे टामटुमीत भागत होते. मात्र, कोरोनामुळे पगारात कपात झाल्यामुळे कुटुंबातील किचनसह इतर खर्चाची जबाबदारी पार पाडताना काटकसर करून महिन्याची कड लावावी लागत आहे.
- एक गृहिणी, कोपरगाव