बाळ बोठे विनयभंगाच्या गुन्ह्यात वर्ग

अहमदनगर : यशस्विनी महिला ब्रिगेडच्या अध्यक्षा रेखा जरे हत्या प्रकरणातील मुख्य आरोपी बाळ बोठे याला गुरुवारी पारनेर न्यायालयाने विनयभंगाच्या गुन्ह्यात वर्ग केले. न्यायालयाबाहेर हजर असलेल्या कोतवाली पोलिसांनी बोठेला तत्काळ ताब्यात घेतले.

हत्येच्या घटनेनंतर तीन महिन्यांपासून फरार असलेल्या आरोपी बाळ बोठेला १३ मार्च रोजी पोलिसांनी हैदराबाद येथून अटक केली. पारनेर न्यायालयात हजर केले असता न्यायालयाने त्याला प्रथम सातनंतर तीन व दोन दिवसांची पोलीस कोठडी सुनावली होती. दरम्यान, कोठडीची मुदत संपत असल्याने पोलिसांनी गुरुवारी (दि. २५) त्याला पारनेर न्यायालयासमोर हजर केले. प्रथम वर्ग न्यायाधीश उमा बोऱ्हाडे यांनी बोठे याला न्यायालयीन कोठडी सुनावली. तसेच त्याला विनयभंगाच्या गुन्ह्यात वर्ग केले.

रेखा जरे यांच्या हत्येनंतर बाळ बोठे फरार असताना त्याच्याविरोधात नगर शहरातील कोतवाली पोलीस ठाण्यात विनयभंगाचा गुन्हा दाखल करण्यात आला होता. बोठे याला अटक झाल्यानंतर कोतवाली पोलीस ठाण्याचे निरीक्षक राकेश मानगावकर यांनी आरोपीला वर्ग करण्यासाठी पारनेर न्यायालयात अर्ज केला होता. गुरुवारी दुपारी आरोपी बोठेला ताब्यात घेण्यासाठी कोतवाली पोलिसांचा मोठा फौजफाटा पारनेर न्यायालयाबाहेर हजर होता.

दरम्यान बोठेला नगर जिल्हा न्यायालयात शुक्रवारी हजर करणार असल्याची माहिती कोतवालीचे निरीक्षक मानगावकर यांनी दिली. त्यामुळे आता बोठेच्या अडचणीत पुन्हा वाढ झाली आहे.