नगर ते पुणे वाहतूक मार्गात बदल

३१ डिसेंबर ते २ जानेवारीपर्यंत अहमदनगर-पुणे महामार्गावरील बेलवंडी फाटा येथून पुण्याकडे जाणारी वाहतूक तसेच नगरकडून सरळ पुण्याकडे जाणारी सर्व प्रकारची वाहने अन्यत्र मार्गे वळविण्यात आली आहेत. बेलवंडी फाटा येथून पुण्याकडे जाणारा वाहतूक मार्ग आता बेलवंडी फाटा, देवदैठण, धावलगाव, पिंपरीकोलंदर, उक्कडगाव, बेलवंडी असा राहणार आहे, तर दौंड महामार्गावरून लोणी व्यंकनाथ ते मढेवडगाव, काष्टी, दौंड ते सोलापूर मार्गे पुणे असा राहणार आहे. नगरकडून सरळ पुण्याकडे जाणाऱ्या सर्व प्रकारच्या वाहतुकीसाठी केडगाव बायपास, अरणगाव बायपास, कोळगाव, लोणी व्यंकनाथ, मढेवडगाव, काष्टी, दौंड ते सोलापूर - पुणे मार्गाने - पुण्याकडे अशी वाहतूक राहणार आहे. बेलवंडी फाटा येथून पुण्याकडे जाणाऱ्या वाहनांना प्रवेश बंद करण्यात आला असून, वरील मार्गाचा वाहनचालकांनी अवलंब करावा, असे आवाहन जिल्हा पोलीस अधीक्षक मनोज पाटील यांनी केले आहे.