टाकळी ढोकेश्वर : पारनेर तालुक्यातील टाकळी ढोकेश्वर येथे २६ ऑगस्ट रोजी रात्री दोनच्या सुमारास स्टेट बँक ऑफ इंडिया या बँकेचे एटीएम मशीन चोरण्याचा प्रयत्न करणारा आरोपीच बनावट चलनी नोटांच्या रॅकेटचा मास्टरमाईंड असल्याचे पोलीस तपासात समोर आले आहे. या आरोपीला पोलिसांनी अटक केली असून, त्याच्याकडून बनावट नोटा छापण्याची सामग्री जप्त करण्यात आली आहे.
एटीएम चोरीबाबत पारनेर पोलिसांनी २४ तासात तीन चोरट्यांना अटक केली होती; मात्र यातील एक आरोपी फरार होता. पोलीस गेल्या काही दिवसांपासून आरोपीच्या मागावर होते. सीसीटीव्ही कॅमेऱ्याच्या साहाय्याने तपास केला असता पोलिसांनी या टोळीचा छडा लावला. वडगाव सावताळ येथील आरोपी सुरेश रोकडे (वय १९) याच्यासह दोन आरोपींना अटक केली. तपास करत असताना आरोपी सुरेश रोकडे हा बनावट नोटा छापत असल्याची माहिती पोलिसांना मिळत गेली. परंतु तो कोठे नोटा छापतो, याबाबत स्पष्ट माहिती मिळत नव्हती. गुन्ह्याचा तपास करत असताना तपासी अधिकारी पोलीस उपनिरीक्षक हनुमंत उगले यांनी आरोपीच्या वडगाव सावताळ येथील घराची झडती घेतली. त्याच्या घरात पाचशे व शंभर रुपयांच्या बनावट चलनी नोटा छापण्यासाठी वापरण्यात येणारे रंग, कागदाची सामुग्री मिळून आली. पोलिसांनी ही सामग्री जप्त केली असून आरोपीच्या विरोधात पारनेर पोलीस स्टेशनला गुन्हा दाखल केला आहे.