मोबाईल परत करत अंगणवाडी कर्मचाऱ्यांचे अकोलेत आंदोलन

सिटूप्रणीत अंगणवाडी कर्मचारी संघटनेच्या नेतृत्वाखाली मार्क्सवादी कम्युनिस्ट पक्षाच्या कार्यालयात यावेळी शेकडो अंगणवाडी कर्मचारी एकत्र आले. मार्क्सवादी कम्युनिस्ट पक्षाच्या कार्यालयापासून भव्य मोर्चा काढत या सदोष मोबाईलची अंगणवाडी कर्मचाऱ्यांनी धिंड काढली. शहरातून मोर्चाने अंगणवाडी कर्मचारी पंचायत समिती कार्यालयात धडकले. जोरदार घोषणाबाजी करत राज्य सरकारच्या व केंद्र सरकारच्या भ्रष्टाचाराचा धिक्कार करण्यात आला. अंगणवाडी कर्मचाऱ्यांना सदोष मोबाईल देणाऱ्या बालकल्याण विभागाचाही यावेळी निषेध करण्यात आला.

आंदोलनाचे नेतृत्व अंगणवाडी कर्मचारी संघटनेचे गणेश ताजणे, आशा घोलप, रंजना पऱ्हाड, अक्काबाई देशमुख, माधुरी वाकचौरे, मंगला शिरसाठ, निर्मला मांगे, आशा पिचड, आशा कांडेकर, रोशनी शिंगोटे, मालती गोसावी, इंदुमती चांदगीर आदींनी केले. किसान सभेचे डॉ. अजित नवले व सिटू कामगार संघटनेच्या जुबेदा मनियार, आराधना बोराडे, प्रतिभा कुलकर्णी, संगीता साळवे आदींनी मोर्चास पाठिंबा व्यक्त केला.