मतदानासाठी ७८० कर्मचारी सज्ज

कोपरगाव तालुक्यातील सवंत्सर, सांगवी भुसार, उक्कडगाव, तिळवणी, घारी, रवंदे, ओगदी, अंचलगाव, सोनारी, हिंगणी, वेळापूर, देर्डे चांदवड, येसगाव, मढी बुद्रुक, मढी खुर्द, आपेगाव, नाटेगाव, कोळगाव थडी, मळेगाव थडी, मायगाव देवी, मनेगाव, काकडी, जेऊर कुंभारी, धोंडेवाडी, अंजनापूर, कोकमठाण, कासली, टाकळी, जेऊर पाटोदा या ग्रामपंचायतींसाठी उद्या ( शुक्रवारी दि.१५) मतदान प्रक्रिया सकाळी साडेसात ते सायंकाळी साडेपाच वाजेपर्यंत पार पडणार आहे. यासाठी २९ ग्रामपंचायतींच्या २७९ जागांपैकी ७ जागा बिनविरोध झाल्या आहेत. उर्वरित २७२ जागांसाठी ६११ उमेदवार निवडणुकीच्या रिंगणात उतरले आहेत. या निवडणुकीत ३२ हजार ८९६ पुरुष व ३० हजार ८८९ स्त्री असे एकूण ६३ हजार ७८५ मतदारांना मतदान करण्याचा अधिकार आहे. या मतदान प्रक्रियेसाठी एकूण १११ मतदान केंद्रे आहेत. त्यामध्ये ११२ मतदान यंत्रे तर १११ नियंत्रण यंत्रे आहेत. तसेच अधिकची १४ मतदान यंत्रे व नियंत्रण यंत्रे ही राखीव ठेवण्यात आली आहेत. ही सर्व प्रक्रिया हाताळण्यासाठी १३० मतदान केंद्राध्यक्ष, ३९० मतदान अधिकारी व १३० शिपाई असणार आहेत. तसेच मतदान केंद्रांवरील सुरक्षेसाठी एकूण १३० पोलीस कर्मचाऱ्यांची नियुक्ती केली आहे. असे एकूण ७८० कर्मचारी या निवडणूक प्रक्रियेत कर्तव्य बजावणार आहेत. तसेच महामंडळाच्या एकूण २१ बस व ६ जीपची व्यवस्था करण्यात आली आहे.

............

२९ ग्रामपंचायतींच्या निवडणुकीतील मतदान प्रक्रिया पाडण्यासाठी तयारी पूर्ण झाली आहे. यासंदर्भात सर्व अधिकारी, कर्मचारी यांना वेळोवेळी प्रशिक्षण देण्यात आले आहे. तसेच कोरोनाच्या पार्श्वभूमीवर मतदान प्रकियेत खबरदारी घेण्यासंदर्भात आवश्यक त्या सर्व सूचनाही देण्यात आल्या आहेत.

- योगेश चंद्रे, तहसीलदार तथा निवडणूक निर्णय अधिकारी, कोपरगाव

..........

कोरोनाच्या पार्श्वभूमीवर सर्वच मतदान केंद्रांवर पंचायत समितीच्या आरोग्य विभागामार्फत कर्मचाऱ्याची नियुक्ती करण्यात आली आहे. हा कर्मचारी प्रत्येक मतदाराचे तापमान तपासणार आहे. जर एखाद्या मतदाराला तापमान आढळले तर त्यास टोकन देऊन त्याचे सायंकाळी मतदान करून घेण्यात येणार आहे. या प्रक्रियेत मतदारांनी देखील अधिकारी, कर्मचारी यांना सहकार्य करावे.

- संतोष विधाते, तालुका वैद्यकीय अधिकारी, पंचायत समिती, कोपरगाव