शटरने दगा दिला अन् एजंट आगीत होरपळला

गैरव्यवहार दडपण्यासाठी पतसंस्थेलाच आग लावण्याचा कट रचला, ही आग शॉर्टसर्किट दाखविण्याचा मनसुबा होता. मात्र आग लावण्यासाठी पतसंस्थेत गेलेल्या एजंटाचा मनसुबा ऐनवेळी अचानक लॉक

नेरच्या महिला क्रेडीट को.आॅप. सोसायटीतील कट उघडकीस नेर : गैरव्यवहार दडपण्यासाठी पतसंस्थेलाच आग लावण्याचा कट रचला, ही आग शॉर्टसर्किट दाखविण्याचा मनसुबा होता. मात्र आग लावण्यासाठी पतसंस्थेत गेलेल्या एजंटाचा मनसुबा ऐनवेळी अचानक लॉक झालेल्या इमारतीच्या शटरने उधळला. एजंटाने बँकेतील कागदपत्रांना आग लावली खरी मात्र त्याला तेथून बाहेरच पडता आले नाही. स्वत:च लावलेल्या आगीत हा एजंटही ३२ टक्के जळाला. पोलिसांना रंगेहात सापडलेल्या या एजंटानेच आता आगीच्या या घटनेमागील बिंग फोडले आणि या कटात सहभागी इतरांची नावेही उघड केली. महिला अर्बन को.आॅप. क्रेडीट सोसायटी मर्यादित नेरमध्ये ही घटना घडली. नेर पोलीस ठाण्याच्या अगदी समोर शाम सव्वालाखे यांच्या इमारतीत पहिल्या माळ्यावर सदर महिला अर्बन को.आॅप. पतसंस्था आहे. रात्री ३ वाजताच्या सुमारास या बँकेला आग लागली. आतून वाचवा वाचवा असा आवाज आल्याने पोलीस ठाण्यात ड्युटीवर तैनात जमादार हरिशचंद्र कार आणि शिपाई लक्ष्मण राऊत हे तेथे पोहोचले. यावेळी बँकेचे शटर बंद होते. अथक प्रयत्न करून शटर उघडण्यात आले. जळालेल्या अवस्थेत एजंट रवींद्र भोयर याला बाहेर काढण्यात आले. या आगीमध्ये बँकेचे फर्निचर आणि दस्ताऐवज जळून खाक झाले. त्यात तीन लाखांचे नुकसान झाल्याचा अंदाज आहे. यावेळी तिजोरीतील ५२ हजाराची रोकड, ११६ कोरे चेक व दोन बाँड सुरक्षित राहिले. एजंट भोयर रात्री ३ वाजता एम.एच.-२९-वाय-१३४६ या होंडा शाहीन गाडीने घटनास्थळी दाखल झाला. त्याने आपली दुचाकी एका गल्लीत ठेवली. आपल्या जवळच्या चाबीने बँकेचे कुलूप उघडले व नंतर शटर लावून घेतले. बँकेतील सर्व दस्ताऐवज मधात ठेऊन त्याने पेट्रोल टाकून ते पेटविले. यावेळी पेट्रोलचा अचानक भडका झाला. भोयरने तेथून पळून जाण्याचा प्रयत्न केला. मात्र वेळेवर शटर उघडले नाही. अखेर स्वत: लावलेल्या या आगीत तो स्वत:च ३२ टक्के भाजला. मदतीसाठी पोलीस धावून आल्याने त्याचे प्राण वाचले. डेली वसुली एजंट भोयरने बँकेला आग नेमकी का लावली, याबाबत वेगवेगळी कारणे पुढे येत आहे. एजंट रवींद्र भोयर याने बयानात सांगितले की, आगीच्या या घटनेत बँकेचे व्यवस्थापक अरविंद चव्हाण आणि शिपाई विलास पोहणकर यांचा सहभाग आहे. रवींद्रच्या पत्नीने पोलिसांना सांगितले की, बँक जाळण्याबाबत रात्री आपल्या पतीला फोनवरून सूचना देण्यात आली होती. तर चपराशी विलास पोहणकर याने सांगितले की, रात्री माझी चाबी हरविली. त्याबाबत घरी गेल्यानंतर लक्षात आले. त्यामुळे मी एजंट भोयरला फोन केला. त्याने ही चाबी शोधली आणि आगीची घटना घडली. पोलिसांनी मोबाईल कॉल डिटेल्सवर केलेल्या तपासात चपराशी पोहणकर व एजंट भोयर यांचे रात्री १२ ते १ दरम्यान अनेकदा संभाषण झाल्याचे निष्पन्न झाले. व्यवस्थापक चव्हाण यांनी भोयरला काल सायंकाळी त्याच्याकडील वसुलीचे पावती बुक तपासण्यासाठी आणण्यास सांगितले होते. त्यानंतर ही घटना घडली. नेर पोलीस ठाण्यात भादंवि ४३६, ३४ कलमान्वये गुन्हा दाखल करण्यात आला. या प्रकरणात बँकेचा एजंट रवींद्र रामभाऊ भोयर (३०) रा. छत्रपतीनगर नेर, शिपाई विलास पोहणकर या दोघांना आरोपी बनविण्यात आले आहे. (तालुका प्रतिनिधी)