भूखंडांची बेकायदा विक्री

दुय्यम निबंधक नोंदणी कार्यालयात नगररचना कायदा आणि बांधकाम नियंत्रण नियमावलीचे उल्लंघन करून भूखंंड खरेदी-विक्री व्यवहार सुरू आहेत.

पुसद : दुय्यम निबंधक नोंदणी कार्यालयात नगररचना कायदा आणि बांधकाम नियंत्रण नियमावलीचे उल्लंघन करून भूखंंड खरेदी-विक्री व्यवहार सुरू आहेत. भूमाफियांच्या बेकायदेशीर खरेदी विक्रीला मार्गदर्शन आणि सहकार्य याच कार्यालयातून होत असून यामुळे भविष्यात अनेक समस्या निर्माण होण्याची शक्यता आहे. महसूल विभागही याकडे डोळेझाक करीत आहे. पुसद तालुक्यात नागरीकरण वाढत असून नगरपालिका आणि ग्रामपंचायत क्षेत्रात मोठ्या प्रमाणावर नागरी वसाहती निर्माण होत आहेत. या स्थितीचा फायदा घेण्यासाठी भूमाफिया सरसावले असून पैशाच्या जोरावर कायद्याची पायमल्ली करून जमिनीचे भूखंड आणि उपखंंड करून विकले जात आहेत. कृषी वापरातील जमिनी अकृषीसाठी उपयोगात आणली जात आहे. यासाठी आवश्यक असणारी अकृषक परवान्याची विहीत पद्धती अनुसरण्यात येत नाही. शहरी क्षेत्रात सहायक संचालक नगरपालिका आणि ग्रामीण क्षेत्रात राज्य शासनाचे सहायक संचालक नगररचना यांचा अंतिम अभिन्यास (ले-आऊट) मंजूर असल्याशिवाय भूखंड खरेदी-विक्री व्यवहाराची नोंदणी करू नये. अशी अट आहे. मात्र पुसदच्या दस्त नोंदणी कार्यालयात या नियमाला फाटा देऊन नोंदण्या होत आहेत. महाराष्टÑ जमीन महसुलाचे कलम ४४ नुसार ज्या प्रयोजनाच्या वापराला अकृषक परवानगी दिली आहे. अशांचा वापर एका वर्षाच्या आत न केल्याचे उघडकीस आल्यास त्याची दस्त नोंदणी दुय्यम निबंधकांनी करू नये, अशी कायद्यात तरतूद आहे. परंतु पुसद कार्यालयात भूखंड माफिया आपले वजन वापरुन सर्रास खरेदी विक्रीच्या नोंदी करीत आहेत. या बेकायदेशीर व्यवहारामुळे खुली जागा (ओपन स्पेस) न ठेवणे. अभिन्यास बदलणे. अंतर्गत रस्ते, मर्यादापेक्षा कमी रुंदीचे ठेवणे असे प्रकार दिसत आहेत. भूखंड खरेदी करणार्‍यांना आपली फसवणूक झाल्याचे लक्षात घेऊनही काहीच करता येत नाही. कारण भूखंड विक्री करणारे दडपशाहीचा वापर करतात. महसूल विभागाच्या वरिष्ठ अधिकार्‍यांनी यावर निर्बंध घालावेत, अशी मागणी होत आहे. (तालुका प्रतिनिधी)