टीव्ही पाहायचाय तर सेट टॉप बॉक्स हवाच

केबल डिजिटायजेशन प्रक्रियेला शहरात प्रारंभ झाला आहे. ३१ डिसेंबरपासून सेट टॉप बॉक्स ज्यांच्याकडे आहे,

यवतमाळ : केबल डिजिटायजेशन प्रक्रियेला शहरात प्रारंभ झाला आहे. ३१ डिसेंबरपासून सेट टॉप बॉक्स ज्यांच्याकडे आहे, त्यांनाच आपल्या टीव्हीवर वाहिन्या दिसणार असल्याने आता सेट टॉप बॉक्स बसवून घेण्याशिवाय पर्याय नाही. अन्यथा केबलचे कोणतेही प्रक्षेपण दिसणार नाही. यासाठी ग्राहकांना १२०० रुपये खर्च करावे लागणार आहेत. महानगर पालिका क्षेत्रात घरोघरी सेट टॉप बॉक्स अनिवार्य करून त्याची अंमलबजावणी झाल्यानंतर आता शासनाने नगरपरिषदांकडे लक्ष केंद्रित केले आहे. त्यामुळे जिल्ह्यातील इतर नगर परिषद क्षेत्रात जरी अद्याप सेट टॉप बॉक्स प्रक्रियेला गती आली नसली, तरी यवतमाळ शहरात ही प्रक्रिया सुरू करण्यात आल्याची माहिती स्थानिक केबल आॅपरेटर्स संचालकांनी दिली. यवतमाळ नगरपरिषदेसह उमरसरा, वडगाव, लोहारा, वाघापूर, पिंपळगाव आदी ग्रामपंचायत परिसरातही सेट टॉप बॉक्स लावणे गरजेचे आहे. परंतु, शहराला लागून असलेल्या भोसा आणि मोहा या ग्रामपंचायत परिसराचा सध्या या प्रक्रियेत समावेश नाही. याबाबत स्थानिक प्रशासनाकडून कोणत्याही स्पष्ट सूचना सर्वसामान्य केबल टीव्ही धारकांना नसल्यामुळे ग्राहकांमध्ये चांगलाच संभ्रम आहे. त्यामुळे यवतमाळ महसूल विभागाने याबाबत भूमिका जाहीर करण्याची मागणी होत आहे. केबल आॅपरेटर्सकडून मात्र सेट टॉप बॉक्स बसविण्याबाबत जनजागृती करण्यात येत असून ज्यांना तो बसवायचा आहे, त्यांना तो बसवूनही दिला जात असल्याचे दिसते. सध्या केबल सेवेमध्ये प्रचंड गोंधळ दिसून येतो. त्यामुळे नागरिकांचीही ओरड आहे. वेळीच तक्रारीची दखल घेतली जात नाही. अनेक भागात नियमित महिन्याकाठी केबलचे पैसे वसूल केले जातात. परंतु कोणतीही पावती दिली जात नसल्याच्याही ग्राहकांच्या तक्रारी आहेत. या सर्व बाबींवर आळा बसणार आहे. त्यामुळे ग्राहकांनी ३१ डिसेंबरपर्यंत सेट टॉप बॉक्स बसवून घेण्यास हरकत नाही. (प्रतिनिधी)दरही वाढणार अन् चॅनलही४एकदाच १२०० रुपये खर्च करून सेट टॉप बॉक्स बसवून घेतल्यानंतर मात्र मासिक भाडे पूर्वीप्रमाणेच परंतु वाढीव द्यावे लागणार आहे. दोनशे ते अडीचशे रुपये महिन्याचे ग्राहकांना मोजावे लागणार आहेत. याचे फायदेही ग्राहकांना मिळणार आहे. पिक्चर कॉलिटी ही अतिशय दर्जेदार राहणार आहे. शिवाय २०० हून अधिक वाहिन्या दिसणार आहेत. त्यामुळे ग्राहकांना यामध्ये चॉईस राहणार आहे सोबतच ग्राहकांना नियमित सेवा मिळणेही शक्य होणार आहे.३१ डिसेंबर ही तारीख सेट टॉप बॉक्ससाठी दिली आहे. त्यामध्ये जर काही मुदतवाढ वगेरे मिळाली तर एप्रिलपासून याची निश्चितच अंमलबजावणी होणार आहे. त्यामुळे ग्राहकांनी सेट टॉप बॉक्स बसवून घेण्यास हरकत नाही. याद्वारे ग्राहकांना दर्जेदार सेवा मिळणार आहे. शिवाय शासनाच्या उत्पन्नातही भर पडणार आहे. - अनुप खांडे, तहसीलदार, यवतमाळ