शासकीय तसेच खासगी रुग्णालयात मोठ्या प्रमाणावर डेंग्यू, मलेरिया, मेंदूज्वरचे रुग्ण दाखल होत आहेत. पहापळ येथे चिकनगुनियाचा एक रुग्ण आढळून आला आहे. याबाबत १६ सप्टेंबरला लोकमतने पांढरकवडा शहरात रुग्णसंख्या वाढली या शीर्षकाखाली वृत्त प्रकाशित केले होते. त्यामुळे प्रशासन खडबडून जागे झाले आहे. नगरपरिषदेचे मुख्याधिकारी राजू मोट्टेमवार यांच्या मार्गदर्शनाखाली आरोग्य विभागाने धडक मोहीम हाती घेतली आहे. नगरपरिषद व आरोग्य विभागाचे संयुक्त पथक तयार करण्यात आले असून शहरात वाॅर्डनिहाय घरोघरी हे पथक भेटी देणार आहे. पथकाद्वारे टेमिफॉस ॲक्टीक्टिव्हिटी, फोगिंग, स्प्रिंग करण्यात येत आहे.
कोट : डेंग्यूचा आजार हा साचलेल्या पाण्यातील डासांमुळे होतो. नागरिकांनी ज्या ठिकाणी पाणी साचलेले आहे, ती जागा साफ करावी. घरातील कुलरमध्ये इतर भांड्यामध्ये साचलेले पाणी काढून टाकावे. ताप अंगावर न काढता तातडीने रुग्णालयात जावे. - संजय मडावी, तालुका आरोग्य अधिकारी पांढरकवडा.
कोट : ८ गाड्यांद्वारे शहरातील १९ ही वाॅर्डातील सुका व ओला कचरा गोळा केला जात असून कचऱ्याची योग्य विल्हेवाट लावली जाते. नाल्या साफ ठेवण्यासाठी विशेष लक्ष देऊन फवारणी केली जात आहे. - हर्षल पवार, आरोग्य विभागप्रमुख पांढरकवडा.