अनेकवेळा विद्युत देयक थकबाकी किंवा अन्य कारणांसाठी महावितरणकडून वीज पुरवठा खंडित करण्यात आल्यानंतर शेजाऱ्यांकडून वीज पुरवठा जोडून घेतला जातो; मात्र नकळत घडणारा हा प्रकार अंगलट येऊ शकतो. शेजाऱ्याकडून वीज पुरवठा घेणाऱ्यांवर आणि तो देणाऱ्यांवरही कारवाई केली जाऊ शकते. घराला लागूनच दुकान आहे, तिथे स्वतंत्र मीटर न घेता घरातूनच वीज पुरवठा जोडलेला असेल, तरीदेखील कारवाईचे प्रावधान आहे, अशी माहिती महावितरणकडून प्राप्त झाली.
................
महावितरणकडून वर्षभरात झालेली कारवाई...
शहर - ५०/१४.४९ लाख/१.१५ कोटी
ग्रामीण - १७/३.५० लाख/३२.६७ लाख
एकूण - ७७/१७.९९ लाख/१.४८ कोटी
...............
कायदा काय सांगतो?
विद्युत कायदा २००३ मधील कलम १२६ नुसार शेजाऱ्यांकडून अनधिकृत पद्धतीने वीज पुरवठा घेणे, मंजूर वर्गवारीतून इतर वर्गवारीसाठी अनधिकृत वीज वापर केल्याप्रकरणी कारवाई केली जाऊ शकते. यासह मीटरशी छेडछाड, आकडा टाकून वीज वापर, सर्व्हिस वायर टॅप केल्यास कलम १३५ नुसार कारवाई केली जाते.
................
चोरी कळवा, दंडातील १० टक्के रक्कम बक्षीस मिळवा
१) २००३ मध्ये तयार केलेल्या विद्युत कायद्यामध्ये महत्त्वपूर्ण तरतुदी करण्यात आल्या आहेत. वाढत्या वीज चोरीला आळा घालण्याकरिता ‘वीजचोरी कळवा, बक्षीस मिळवा’, ही अभिनव योजनाही हाती घेण्यात आली आहे.
याअंतर्गत वीजचोरीची माहिती देणाऱ्यांची नावे गोपनीय ठेवली जातात. एवढेच नव्हे, तर संबंधितास वीजचोराकडून वसूल करण्यात आलेल्या दंडातील १० टक्के रक्कम बक्षीस म्हणून दिली जाते.
...............
कोट :
महावितरणकडून पुरविली जाणारी वीज चोरट्या मार्गाने वापरणाऱ्यांची कुठलीच गय केली जात नाही. त्यामुळे ग्राहकांनी जागरूक राहावे. शेजाऱ्यांकडून अनधिकृत पद्धतीने वीज वापरणाऱ्यांवर आणि घरातील वीज दुकानासाठी वापरणाऱ्यांवरही कारवाई करण्याची तरतूद कायद्यात करण्यात आलेली आहे.
- सतीश मोरे
अति. कार्यकारी अभियंता, भरारी पथक, वाशिम