जिल्हा परिषद स्थायी समितीची सभा गाजली

निकृष्ट पाइप खरेदी मुद्या गाजला; सभेत अधिका-यांच्या अनुपस्थितीवर सदस्य आक्रमक.

वाशिम : जिल्हा परिषदेच्या कृषी व समाजकल्याण विभागांतर्गत खरेदी करण्यात आलेले पाइप निकृष्ट दर्जाचे असल्याचा आरोप करून सभेत अधिकार्‍यांची अनुपस्थितीवर नाराजी व्यक्त करीत जिल्हा परिषद सदस्य आक्रमक झाले. यावेळी डीपीडीसीकडे प्रलंबित असलेला निधी व नरेगा अंतर्गत सिंचन विहिरीसह अनेक विषयांवर सभा गाजली. स्थानिक जिल्हा परिषद सभागृहात पार पडलेल्या स्थायी सभेत जिल्हा परिषद अध्यक्ष सोनाली जोगदंड, उपाध्यक्ष चंद्रकांत ठाकरे, अतिरिक्त मुख्य कार्यकारी अधिकारी अहमद, सभापती ज्योतीताई गणेशपुरे व सुभाष शिंदे यांची प्रमुख उपस्थिती होती. सभेच्या सुरुवातीलाच विविध खात्याचे अधिकारी हजर नसल्यामुळे जिल्हा परिषद सदस्यांनी आक्रमक भूमिका घेतली. सुमारे अर्धा ते पाउणतास या विषयावर चर्चा झाल्यानंतर कृषी व समाजकल्याण विभागामार्फत खरेदी करण्यात आलेले पाइप निकृष्ट दर्जाचे असल्याचा मुद्दा तसेच डीपीडीसीकडील प्रलंबित निधी व नरेगा सिंचन विहीर योजनेतून रिसोड व मंगरुळपीरला वगळण्याचा मुद्दा उपाध्यक्ष चंद्रकांत ठाकरे व विकास गवळी यांनी उचलून धरला. यावेळी जिल्हा परिषद सदस्य आक्रमक झाले होते. यासह विविध प्रश्नांवर स्थायी समिती सभा गाजली. अनेक दिवसांनंतर स्थायी समिती सभेत विविध विषयांवर चर्चा दिसून आली.