विदर्भाचे लोकनेते दत्ता मेघे अनंतात विलीन; शासकीय इतमामात अंत्यसंस्कार

Vardha : विदर्भातील ज्येष्ठ नेते, माजी मंत्री व माजी खासदार, लोकनेते दत्ता राघोबाजी मेघे अनंतात विलीन झाले. त्यांच्या पार्थिवावर सोमवारी सायंकाळी पवनार येथील त्यांच्या शेतात शासकीय इतमामात अंत्यसंस्कार करण्यात आले.

वर्धा/पवनार : विदर्भातील ज्येष्ठ नेते, माजी मंत्री व माजी खासदार, लोकनेते दत्ता राघोबाजी मेघे अनंतात विलीन झाले. त्यांच्या पार्थिवावर सोमवारी सायंकाळी पवनार येथील त्यांच्या शेतात शासकीय इतमामात अंत्यसंस्कार करण्यात आले. या वेळी मुख्यमंत्री देवेंद्र फडणवीस, केंद्रीय मंत्री नितीन गडकरी, महसूलमंत्री चंद्रशेखर बावनकुळे, पालकमंत्री डॉ. पंकज भोयर यांच्यासह अनेक आजी व माजी लोकप्रतिनिधी उपस्थित होते.

दत्ता मेघे यांचे रविवारी रात्री नागपूर येथील निवासस्थानी निधन झाले. सोमवारी दुपारी त्यांचे पार्थिव सावंगी (मेघे) येथील निवासस्थानी आणण्यात आले. तेथे त्यांचे पार्थिव अंत्यदर्शनासाठी ठेवण्यात आले. या वेळी राजकीय मंडळी, सामाजिक कार्यकर्ते, रुग्णालयातील सर्व अधिकारी, कर्मचारी, डॉक्टर, विद्यार्थ्यांसह अनेकांनी श्रद्धांजली अर्पण केली. तेथून दुपारी ४.३० वाजताच्या सुमारास सजविलेल्या ट्रकवरून त्यांची अंत्ययात्रा निघाली.

वर्धा शहरातून अंत्ययात्रा जात असताना ठिकठिकाणी त्यांना हारार्पण करून श्रद्धांजली अर्पण करण्यात आली. सायंकाळी ५.३० वाजताच्या सुमारास ही अंत्ययात्रा पवनार येथील त्यांच्या शेतात पोहोचली. तेथे त्यांना अखेरचा निरोप देण्यात आला.

पोलिसांनी झाडल्या तीन फैरी

दत्ता मेघे यांच्या पार्थिवावर शासकीय इतमामात अंत्यसंस्कार करण्यात आले. या वेळी पोलिसांनी आकाशात तीन फैरी झाडून त्यांना मानवंदना दिली. ज्येष्ठ पुत्र माजी आमदार सागर मेघे आणि कनिष्ठ पुत्र हिंगण्याचे आमदार समीर मेघे यांनी त्यांच्या पार्थिवाला मुखाग्नी दिला. या वेळी मुख्यमंत्री देवेंद्र फडणवीस, केंद्रीय परिवहनमंत्री नितीन गडकरी, महसूलमंत्री चंद्रशेखर बावनकुळे, पालकमंत्री डॉ. पंकज भोयर, वित्त, नियोजन, कृषी, मदत व पुनर्वसन, विधी व न्याय, कामगार राज्यमंत्री अॅड. आशिष जयस्वाल, खासदार अमर काळे, आमदार अॅड. अभिजित वंजारी, आमदार समीर कुणावार, आमदार राजेश बकाने, आमदार चरण ठाकूर, माजी मंत्री रणजित देशमुख, माजी केंद्रीय राज्यमंत्री हंसराज अहीर, विशेष पोलिस महानिरीक्षक संदीप पाटील, माजी राज्यमंत्री राजेंद्र मुळक, जिल्हाधिकारी वान्मथी वान्मथी सी, मुख्य कार्यकारी अधिकारी पराग सोमण, जिल्हा पोलिस अधीक्षक सौरभ कुमार अग्रवाल, माजी खासदार रामदास तडस, सुरेश वाघमारे, नगराध्यक्ष सुधीर पांगुळ यांच्यासह माजी खासदार, आमदार व विविध क्षेत्रातील मान्यवर उपस्थित होते.

माजी मंत्री रणजित देशमुख पोहोचले व्हीलचेअरवर

नागपूर येथील रहिवासी माजी मंत्री रणजित देशमुख आणि माजी खासदार दत्ता मेघे यांचे मित्रत्वाचे नाते राहिले आहे. हेच नाते देशमुख यांनी शेवटपर्यंत जपल्याचे दिसून आले. आज लोकनेते दत्ता मेघे यांच्या अंत्यदर्शनासाठी रणजित देशमुख यांनी व्हीलचेअरवर बसून थेट अंत्यविधीचे ठिकाण गाठले.