वर्धा : भारतीय जनता पक्षाने अखेर शनिवारी जिल्हाध्यक्षपदाची माळ पुलगावचे संजय गजानन गाते यांच्या गळ्यात टाकली. जिल्हाध्यक्षपदावर ओबीसी चेहरा कायम ठेवला असला, तरी ‘मोहरा’ मात्र बदलला आहे.
भाजपने यापूर्वी राज्यातील काही जिल्हाध्यक्षांची घोषणा केली होती. मात्र, त्यात जिल्ह्याचा समावेश नव्हता. नंतर ७ मे राेजी मुंबईत कोअर कमिटीची बैठक झाली. त्या बैठकीतही कुणाच्याच नावावर शिक्कामोर्तब झाले नाही. अखेर शनिवारी उर्वरित २२ जिल्हाध्यक्षांची यादी जाहीर झाली. त्यात जिल्हाध्यक्षपदी संजय गाते यांची वर्णी लागली. भाजपने पुन्हा ‘ओबीसी’ चेहरा कायम ठेवला असला तरी ‘मोहरा’ बदलून पुढील स्थानिक स्वराज्य संस्थांच्या निवडणुकीची रणनीती आखली आहे.
जिल्ह्यात खासदार वगळता भाजपकडे एक विधानपरिषद आणि चार विधानसभा सदस्य आहेत. संघटनात्मक पातळीवर पक्ष मजबूत आहे. यापूर्वी ओबीसी प्रवर्गातील सुनील गफाट यांच्या रूपाने भाजपने बहुसंख्य कुणबी समाजाला जिल्हाध्यक्षपद दिले होते. आता भाजपने सुरुवातीपासून राष्ट्रीय स्वयंसेवक संघाशी जुळलेल्या संजय गाते यांच्या रूपाने कुंभार समाजातील व्यक्तीला जिल्हाध्यक्षपद बहाल केले आहे.
कोण आहेत संजय गाते?
संजय गाते सध्या भारतीय जनता पार्टी ओबीसी मोर्चाचे प्रदेशाध्यक्ष म्हणून कार्यरत आहे. ते बालपणापासून अर्थात १९८७ पासून राष्ट्रीय स्वयंसेवक संघाचे स्वयंसेवक आहे. १९८९ ते ९२ पर्यंत ते पुलगावच्या समर्थ सायम शाखेत गटनायक ते मुख्य शिक्षक होते. १९९३ ते २००० पर्यंत ते अभाविपचे नगर संघटक, जिल्हा संघटक, विदर्भ प्रांत सहमंत्री होते. २००० ते २००७ पर्यंत राष्ट्रीय स्वयंसेवक संघाचे सेलू तालुका सहकार्यवाह, पुलगाव कार्यवाह होते. २००७ ते १३ पर्यंत ते भाजपचे देवळी तालुका सरचिटणीस आणि २००९ ते १२ पर्यंत महाराष्ट्र कुंभार महासंघाचे जिल्हाध्यक्ष होते. २०१२ ते १४ पर्यंत महाराष्ट्र कुंभार महासंघाचे विदर्भ अध्यक्ष होते.
२०१३ पासून जिल्हास्तरावर विविध पदे
संजय गाते २०१३ मध्ये प्रथम भाजपचे जिल्हा चिटणीस झाले. ते २०१६ पर्यंत या पदावर होते. त्याच काळात २०११ ते १६ पर्यंत ते पुलगावचे नगरसेवक होते. २०१४ ते २० पर्यंत ते महाराष्ट्र कुंभार महासंघाचे प्रदेशाध्यक्ष होते. दरम्यान, डिसेंबर २०१६ मध्ये भाजपने त्यांच्या खांद्यावर ओबीसी मोर्चाचे प्रदेश सरचिटणीस म्हणून जबाबदारी टाकली. नंतर २०२३ मध्ये त्यांना बढती देत थेट ओबीसी मोर्चाचे प्रदेशाध्यक्ष केले.
‘लोकमत’चे भाकीत ठरले खरे
भाजपमध्ये जिल्हाध्यक्ष पदासाठी चुरस सुरू होती. अनेक नावे चर्चेत होती. मात्र, जिल्हाध्यक्षपदावर देवळी विधानसभा मतदारसंघातील व्यक्तीचीच निवड होईल, असे भाकीत ‘लाेकमत’ने वर्तविले होते. संजय गाते देवळी विधानसभा मतदारसंघातील पुलगाव येथील रहिवासी आहे. त्यामुळे ‘लोकमत’च्या भाकीतावर शिक्कामोर्तब झाले आहे.