Shocking: मामीच्या प्रेमात वेडा झाला भाचा; लग्नात अडथळा ठरणाऱ्या पत्नीचा काढला काटा!

Uttar Pradesh Sambhal Crime: उत्तर प्रदेशातील संभल जिल्ह्यात नात्यांना काळिमा फासणारी घटना समोर आली. आपल्या मामीशी लग्न करण्याच्या हट्टापायी एका व्यक्तीने आपल्या चार मुलांच्या डोळ्यांदेखत पत्नीची हत्या केली.

उत्तर प्रदेशातील संभल जिल्ह्यात नात्यांना काळिमा फासणारी घटना समोर आली. आपल्या मामीशी लग्न करण्याच्या हट्टापायी एका व्यक्तीने आपल्या चार मुलांच्या डोळ्यांदेखत पत्नीची हत्या केली. या खळबळजनक घटनेनंतर आरोपीने कात्रीने स्वतःवर वार करून आत्महत्येचा प्रयत्न केला. मात्र, घटनास्थळी उपस्थित असलेल्या लोकांनी त्याला पकडले आणि पोलिसांच्या स्वाधीन केले.

हा थरारक गुन्हा संभल कोतवाली पोलीस ठाण्याच्या हद्दीतील मंडी किशनदास सराय या गावात घडला. मृत महिलेची ओळख नजमा (वय, ३८) अशी पटली असून, ती आशा वर्कर म्हणून काम करायची. तर, आरोपी पती मोहम्मद नफीस (वय, ४०) हा मेडिकल स्टोअरचा मालक असल्याचे समजते. मिळालेल्या माहितीनुसार, नफीसचे गेल्या सुमारे तीन वर्षांपासून आपल्या मामाच्या बायकोसोबत अनैतिक संबंध होते. त्यामुळे दोघांमध्ये वारंवार वाद व्हायचे. वैतागून नजमा आपल्या चार मुलांसह पतीचे घर सोडले आणि मंडी किशनदास सराय परिसरातीलच एका गावात भाड्याच्या घरात राहू लागली. सहा महिन्यांनंतर, तिला आशा वर्करची नोकरी मिळाली आणि तिने स्वतंत्रपणे आपल्या मुलांचा सांभाळ करण्यास सुरुवात केली.

मामीशी लग्नाचा हट्ट आणि वारंवार वाद

गेल्या अनेक महिन्यांपासून नफीस नजमावर घटस्फोटासाठी दबाव टाकत होता, जेणेकरून त्याला आपल्या मामीशी लग्न करता येईल. मात्र, नजमा यासाठी तयार नव्हती. रविवारी रात्री, आपले मेडिकल स्टोअर बंद करून नफीस आपल्या पत्नीशी बोलण्यासाठी तिच्या घरी गेला. रात्री साधारण १०:३० च्या सुमारास, घटस्फोटाच्या मुद्द्यावरून दोघांमध्ये जोरदार भांडण झाले. त्यानंतर हा वाद इतका पेटला की, नफीसने रागाच्या भरात घरात पडलेली कात्री उचलली आणि नजमावर सपावर वार केले. या हल्ल्यात गंभीर जखमी झालेल्या नजमाचा जागीच मृत्यू झाला. हा भयानक प्रसंग त्या चारही मुलांच्या डोळ्यांदेखत घडला.

पत्नीची हत्या केल्यानंतर आत्महत्येचा प्रयत्न

या घटनेनंतर, नफीसनेही स्वतःही आत्महत्येचा प्रयत्न केला. नफीसने कात्रीने स्वतःवर वार केले. मात्र, आरडाओरडा ऐकून शेजाऱ्यांनी धाव घेतली आणि त्याला पकडून पोलिसांना माहिती दिली. याप्रकरणी पोलिसांनी नफीसला ताब्यात घेतले असून जखमी अवस्थेत त्याला वैद्यकीय उपचारासाठी मोरादाबाद येथे हलवण्यात आले. आरोपीला ताब्यात घेण्यात आले असून या प्रकरणाचा तपास सुरू करण्यात आला आहे. सध्या फॉरेन्सिक विश्लेषणासाठी पुरावे गोळा करण्याचे काम सुरू आहे.

पोलीस काय म्हणाले?

या प्रकरणाबाबत बोलताना निरीक्षक गजेंद्र सिंग यांनी सांगितले की, हत्येचा आरोप असलेल्या पतीला ताब्यात घेण्यात आले असून त्याला वैद्यकीय उपचारांसाठी पाठवण्यात आले आहे. रक्ताने माखलेली कात्री जप्त करण्यात आली असून बोटांच्या ठशांच्या विश्लेषणासाठी ती फॉरेन्सिक प्रयोगशाळेत पाठवण्यात आली आहे. या प्रकरणी पोलिसांनी पुढील तपास सुरू आहे.