Crime: कानपूरमध्ये विवाहितेचा संशयास्पद मृत्यू; व्हॉट्सअ‍ॅप स्टेटसनं वाढवलं गूढ, पोलीस तपास सुरू

उत्तर प्रदेशातील कानपूरमधील 'विश्व बँक' परिसरात एका विवाहित महिलेचा संशयास्पद मृत्यू झाल्याची खळबळजनक घटना समोर आली. मृत्युच्या काही काळ आधी तिने ठेवलेल्या व्हॉट्सअ‍ॅप स्टेटसमुळे या प्रकरणाचे गूढ अधिक वाढले आहे. याप्रकरणी स्थानिक पोलीस ठाण्यात मृत्युची नोंद करण्यात आली आहे. सध्या पोलिसांनी सासरच्या मंडळींची चौकशी सुरू केली असून, शवविच्छेदन अहवालाकडे सर्वांचे लक्ष लागले आहे.

काय आहे नेमकं प्रकरण?

सोनाली ऊर्फ श्रद्धा असे मृत महिलेचे नाव असून ती मूळची इटावा येथील भरथाना येथील रहिवाशी असून सध्या ती कानपूरमध्ये आपल्या सासरच्या लोकांसोबत राहत होती. मिळालेल्या माहितीनुसार, ज्यावेळी ही घटना घडली, तेव्हा सोनाली बेडरूममध्ये एकटीच होती. तिचा मृतदेह ज्या अवस्थेत सापडला, त्यावरून संशयाचे वातावरण निर्माण झाले आहे. घटनास्थळी संघर्षाच्या कोणत्याही खुणा आढळल्या नसल्या तरी, परिस्थिती पाहता घातपाताची शक्यता वर्तवण्यात येत आहे.

व्हॉट्सअ‍ॅप स्टेटस ठरतंय चर्चेचा विषय

सोनालीने मृत्युच्या काही वेळापूर्वी आपल्या व्हॉट्सअ‍ॅप स्टेटसवर एक सूचक पोस्ट टाकली. यात तिने लिहिले होते की, "आम्ही आमचे निर्णय उघडपणे घेतो". हे स्टेटस तिचे शेवटचे विचार होते की, एखाद्या घटनेचा इशारा, याचा तपास आता पोलीस करत आहेत. या स्टेटसमुळे पोलीस आणि कुटुंबीय दोघेही चक्रावून गेले आहेत.

माहेरच्यांकडून हत्येचा आरोप

सोनालीच्या मृत्युची माहिती मिळताच तिच्या माहेरच्यांनी सासरच्या मंडळींवर गंभीर आरोप केले आहेत. सोनालीच्या भावाच्या म्हणण्यानुसार, "लग्नानंतर काही काळापासून सासरच्यांशी तिचे सतत वाद होत होते. हे प्रकरण आत्महत्या नसून पूर्वनियोजित हत्या आहे." सासरच्या छळामुळेच तिने टोकाचे पाऊल उचलले की तिची हत्या करण्यात आली, अशी भिती व्यक्त करत भावाने सखोल चौकशीची मागणी केली आहे.

घटनेची माहिती मिळताच डीसीपी दीपेंद्रनाथ चौधरी यांनी पोलीस ताफा आणि फॉरेन्सिक तज्ज्ञांसह घटनास्थळी धाव घेतली. संपूर्ण घराची आणि बेडरूमची कसून तपासणी करण्यात आली आहे. "महिलेचा मृतदेह शवविच्छेदनासाठी पाठवण्यात आला आहे. पोस्टमार्टम रिपोर्ट आल्यानंतरच मृत्यूचे नेमके कारण स्पष्ट होईल. पीडित कुटुंबाच्या तक्रारीनुसार गुन्हा दाखल केला जाईल आणि पुराव्यांच्या आधारे पुढील कारवाई केली जाईल", असे दीपेंद्रनाथ चौधरी यांनी म्हटले आहे.