ठाणे - सत्ता-स्थापनेपेक्षा शेतकऱ्यांचे हित महत्वाचे असून शेतकऱ्यांना तात्काळ मदत मिळावी, यासाठी महाआघाडीचे नेते राज्यपालांची भेट घेणार असल्याचे शिवसेनेचे नेते एकनाथ शिंदे यांनी स्पष्ट केले आहे. शेतकऱ्यांसाठी मुख्यमंत्री सहायता निधीदेखील सुरु करण्याची मागणी यावेळी करण्यात येणार असल्याचे एकनाथ शिंदे यांनी सांगितले. त्यामुळे महाआघाडीचे नेते राज्यपालांना भेटून सत्तास्थापनेविषयी काही हालचाली करतील अशी अपेक्षा करण्यात आली होती, ती एवढ्या लवकर होणार नसल्याचे स्पष्ट झाले आहे.
राज्यात सत्तास्थापनेचा पेच कायम असला तरी, राष्ट्रवादीचे राष्ट्रीय अध्यक्ष शरद पवार, तसेच शिवसेना पक्षप्रमुख उद्धव ठाकरे हे शेतकऱ्यांचे प्रश्न सोडवण्याला प्राधान्य देत आहेत. आज महाआघाडीचे नेते राज्यपालांची भेट घेऊन सत्ता स्थापनेविषयी काही हालचाली करतील अशी शक्यता वर्तवण्यात आली होती. मात्र, शिवसेनेचे ज्येष्ठ नेते एकनाथ शिंदे यांनी मात्र शेतकऱ्यांचे प्रश्न मांडण्यासाठी राज्यपालांची भेट घेणार असल्याचे स्पष्ट केले आहे. ठाणे महापालिकेच्या महापौर पदासाठी एकनाथ शिंदे यांच्या उपस्थितीमध्ये अर्ज दाखल करण्यात आला, यावेळी त्यांनी ही प्रतिक्रिया दिली आहे.
अवकाळी पावसामुळे शेतकऱ्यांचे मोठ्या प्रमाणात नुकसान झाले असून सत्ता-स्थापनेपेक्षा त्यांना आर्थिक मदत मिळणे आवश्यक असल्याचे एकनाथ शिंदेंनी सांगितले. सत्तास्थापनेबाबत सर्वच आमदारांनी शिवसेना पक्षप्रमुख उद्धव ठाकरे यांना अधिकार दिले आहेत. त्यामुळे तेच यासंदर्भात निर्णय घेतील, असे त्यांनी स्पष्ट केले. तसेच, महापौर पदासाठी आणि उपमहापौर पदासाठी अर्ज दाखल केलेल्या नरेश म्हस्के आणि पल्लवी कदम यांना शुभेच्छाही दिल्या.