मीरा भाईंदर मधील माजी नगरसेवकांच्या संपत्तीची उत्तुंग भरारी ; सर्वात जास्त पालिकेतील सत्तेचे लाभार्थी ठरले भाजपाचे माजी नगरसेवक

गेल्या ८ वर्षात अनेकांची संपत्ती दुपटी पासून ५ पटीने वाढली आहे.

मीरारोड - मीरा भाईंदर महापालिकेत २०१७ साली निवडून आलेल्या आणि पुन्हा निवडणूक रिंगणात असलेल्या अनेक माजी नगरसेवकांच्या संपत्तीने उत्तुंग अशी भरारी घेतली आहे. गेल्या ८ वर्षात अनेकांची संपत्ती दुपटी पासून ५ पटीने वाढली आहे. अनेकांची मालमत्ता नगरसेवक झाल्यावर फोफावल्याने स्वतःची व निकटवर्तीयांची घरे भरल्याच्या आरोपांना बळ मिळाले आहे.

अनेक माजी नगरसेवक उमेदवारांनी त्यांची मालमत्ता मुलांच्या नावे केली आहे. तर अनेकांनी त्यांच्या निकटवर्तीयांच्या नावे फिरवल्याची देखील चर्चा आहे. वार्षिक उत्पन्न काही लाखात मात्र संपत्ती करोडोंची आहे. कोणी नोकरी तर कोणी व्यवसाय उत्पन्नाचे साधन दाखवले आहे.  आगरी समाजातील काहींच्या मालमत्ता ह्या वारसा हक्काने जमिनी मिळाल्याने तसेच मालमत्ता - जमिनींचे भाव वाढल्याने वाढलेल्या दिसतात. त्यातही भाजपाच्या माजी नगरसेवकांच्या मालमत्ता दुपटी पेक्षा जास्त वाढल्याने महापालिकेतील २०१७ पासूनची सत्ता त्यांना चांगलीच फळली असल्याचे दिसून येते. 

निवडणुकीतील सर्वात श्रीमंत उमेदवार भाईंदर पूर्वेच्या प्रभाग ४ मधील शिवसेना शिंदे गटाचे उमेदवार धनेश परशुराम पाटील यांची १४३ कोटी ९५ लाखांची संपत्ती आहे. त्यापैकी तब्बल १४० कोटी ४९ लाख रुपयांची जमीन, सदनिका आदी स्थावर मालमत्ता आहे. मागील निवडणुकीत ३१ कोटी १८ लाखांची संपत्ती दर्शवली होती. त्यांच्या वडिलोपार्जित जमिनी मोठ्या प्रमाणात आहेत. प्रभाग १२ मधील भाजपचे माजी उपमहापौर हसमुख गेहलोत यांची  मागील निवडणुकीत असलेली ४ कोटी ५५ लाख रुपयांची संपत्ती तब्बल १४ कोटी पर्यंत वाढली आहे. त्यामुळे भाजपाचे प्रभाग ८ मधील सुरेश खंडेलवाल यांची २०१७ मध्ये असलेली ५ कोटी ५७ लाख रुपयांची संपत्ती २५ कोटी ३३ लाख वर पोहचली आहे. भाजपचे ध्रुवकिशोर पाटील यांची संपत्ती ९८ लाखांवरून १ कोटी ८८ लाख झाली आहे. ध्रुवकिशोर राहतात तो आलिशान मोठा फ्लॅट मात्र त्यांच्या भावाच्या नावे आहे.  पाटील यांच्या निकटवर्तीय भाजपा उमेदवार ऍड. श्रद्धा कदम यांची संपत्ती तब्बल ५ कोटी ६ लाख आहे. 

माजी नगरसेवक सचिन म्हात्रे यांच्या पत्नी मयुरी यांनी २ कोटी ७ लाख मालमत्ता दाखवली आहे. सचिन यांनी गेल्यावेळी ७४ लाख २५ हजार मालमत्ता दाखवली होती. प्रभाग २३ मधील लाचखोरी - भ्रष्टाचारच्या गुन्ह्यात ५ वर्षांचा कारावास आणि ५ लाखांच्या दंडची शिक्षा झालेल्या भाजपा उमेदवार वर्षा भानुशाली यांची १ कोटी १० लाखांची संपत्ती यंदा ३ कोटी १९ लाखांवर गेली आहे. अनधिकृत बांधकाम प्रकरणी लाच घेताना पकडलेले प्रभाग १ मधील भाजपाचे अशोक तिवारी यांची संपत्ती १ कोटी ८१ लाखांवरून तब्बल ६ कोटी ८७ लाख झाली आहे. 

भाजपाचे माजी नगरसेवक उमेदवार - 

प्रभाग	नाव	२०१७ ची मालमत्ता	२०२६ ची मालमत्ता
प्रभाग 12	माजी महापौर डिम्पल मेहता	26 कोटी 78 लाख	30 कोटी 68 लाख
प्रभाग 7	ऍड. रवी व्यास	5 कोटी 15 लाख	10 कोटी 70 लाख
प्रभाग 2	शानू गोहिल	97 लाख	3 कोटी 39 लाख
	मदन सिंह	1 कोटी 2 लाख	2 कोटी 61 लाख
प्रभाग 3	गणेश शेट्टी	4 कोटी 1 लाख	9 कोटी 77 लाख
प्रभाग 5	मुन्ना सिंह	43 लाख	1 कोटी 3 लाख
	वंदना मंगेश पाटील	12 कोटी 11 लाख	13 कोटी 52 लाख
प्रभाग 6	सुनीता जैन	1 कोटी 45 लाख	3 कोटी 1 लाख
प्रभाग 14	माजी महापौर ज्योत्स्ना हसनाळे	4 कोटी 79 लाख	6 कोटी 84 लाख
	मीरादेवी यादव	1 कोटी 60 लाख	3 कोटी 64 लाख
प्रभाग 15	मोहन म्हात्रे	1 कोटी 70 लाख	3 कोटी 28 लाख
	सुरेखा सोनार	2 कोटी 71 लाख	3 कोटी 64 लाख
प्रभाग 16	वंदना भावसार	58 लाख	2 कोटी 2 लाख
प्रभाग 17	प्रशांत दळवी	1 कोटी 79 लाख	3 कोटी 71 लाख
	दीपिका अरोरा	1 कोटी 59 लाख	2 कोटी 42 लाख
	हेमा बेलानी	6 कोटी 15 लाख	9 कोटी 10 लाख
प्रभाग 18	नीला सोन्स	5 कोटी 62 लाख	11 कोटी 28 लाख
प्रभाग 20	दिनेश जैन	2 कोटी 2 लाख	5 कोटी 5 लाख
	हेतल परमार	35 लाख	1 कोटी 17 लाख
प्रभाग 21	मनोज दुबे	2 कोटी 91 लाख	6 कोटी 65 लाख
	अनिल विराणी	3 कोटी 20 लाख	4 कोटी 6 लाख
प्रभाग 23	जयेश भोईर	1 कोटी 12 लाख	2 कोटी 28 लाख

भाजपाचे माजी नगरसेवक (बंडखोर)

प्रभाग	नाव	२०१७ ची मालमत्ता	२०२६ ची मालमत्ता
प्रभाग 1	रिटा शाह	3 कोटी 37 लाख	5 कोटी 38 लाख
प्रभाग 4	गणेश भोईर	1 कोटी 56 लाख	2 कोटी 3 लाख
	प्रभात पाटील	3 कोटी 65 लाख	5 कोटी 99 लाख
प्रभाग 5	डॉ. प्रीती पाटील	34 कोटी 71 लाख	43 कोटी 54 लाख
	सुनीता भोईर	61 लाख	7 कोटी 7 लाख
प्रभाग 9	नरेश पाटील	55 लाख	1 कोटी 54 लाख

शिवसेना शिंदे गटाचे माजी नगरसेवक उमेदवार

प्रभाग	नाव	२०१७ ची मालमत्ता	२०२६ ची मालमत्ता
प्रभाग 8	माजी महापौर कॅटलीन परेरा	6 कोटी 75 लाख	14 कोटी 63 लाख
प्रभाग 10	तारा विनायक घरत	1 कोटी 87 लाख	5 कोटी 53 लाख
प्रभाग 11	वंदना आणि विकास पाटील	6 कोटी 31 लाख	11 कोटी 81 लाख
प्रभाग 15	कमलेश भोईर	78 लाख	1 कोटी 29 लाख
प्रभाग 16	भावना व राजू भोईर	11 कोटी	13 कोटी 30 लाख

शिवसेना उद्धव ठाकरे गटाच्या प्रभाग ३ मधील उमेदवार नीलम ढवण यांची मालमत्ता देखील १ कोटी ९० लाखांवरून ४ कोटी ६३ लाख रुपये झाली आहे.