मीरा भाईंदर महापालिका स्थायी समिती सभापती पदासाठी ४ मार्चला होणार निवडणूक

महापालिकेत ९५ पैकी ७८ भाजपाचे नगरसेवक आहेत

लोकमत न्यूज नेटवर्क, मीरारोड: मीरा भाईंदर महापालिकेच्या तिजोरीच्या चाव्या समजली जाणारी स्थायी समिती ही पूर्णपणे भाजपाच्या ताब्यात आहे. आता स्थायी समिती सभापती पदासाठी भाजपात चुरस असून येणाऱ्या ४ मार्च रोजी सभापती पदाची माळ कोणाच्या गळ्यात पडणार, हे आमदार नरेंद्र मेहतांवर अवलंबून असणार आहे.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

महापालिकेत ९५ पैकी ७८ नगरसेवक भाजपाचे निवडून आल्याने १६ सदस्यांच्या स्थायी समिती मध्ये देखील भाजपाचे पूर्ण वर्चस्व असून १३ सदस्य समितीमध्ये आहेत. भाजपाचे गटनेते हसमुख गेहलोत सह पंकज पांडेय, दीपक सावंत, विशाल पाटील, संजय थेराडे, हेतल परमार, गणेश शेट्टी, नवीन सिंह, वंदना भावसार, आनंद मांजरेकर, अनिल विराणी, श्रीप्रकाश उर्फ मुन्ना सिंह व मनोज दुबे हे नगरसेवक सदस्य आहेत. मीरा भाईंदर विकास आघाडीच्या वतीने काँग्रेसचे गटनेते जय ठाकूर, अनिल सावंत तर शिंदेसेनेच्या शर्मिला बगाजी आहेत.

आ. मेहतांचे मर्जीतले मानले जाणारे हसमुख गेहलोत यांना गटनेते पाठोपाठ स्थायी समिती मध्ये पण सदस्य केल्याने सभापती पदाची माळ आ. मेहता हे त्यांच्याच गळ्यात टाकण्याची शक्यता वर्तवली जात आहे. भाजपाचे जवळपास सर्वच सदस्य हे आ. मेहतांचे समर्थक मानले जातात. महापालिकेत पदे देण्याच्या निर्णयात आ. मेहतांचा शब्द मोलाचा असून महापौर पदी त्यांनी त्यांच्या भावाची पत्नी डिंपल यांना पुन्हा संधी दिली. या शिवाय अन्य पदे देखील मर्जीतल्याना दिली आहेत. 

साहजिकच पालिका तिजोरीच्या चाव्या असलेले स्थायी समिती सभापती पद देखील आ. मेहता हे त्यांच्याच मर्जीतल्या नगरसेवकास देणार असे मानले जाते. स्थायी समिती सभापती पदासाठी महापालिका आयुक्तांच्या पत्रा नंतर कोकण विभागीय आयुक्त डॉ. विजय सूर्यवंशी यांनी मंगळवारी दि. २४ फेब्रुवारी रोजी पत्र काढून पीठासीन अधिकारी म्हणून मुंबई उपनगरचे जिल्हाधिकारी सौरभ कटियार यांची नियुक्ती केली आहे. ४ मार्च रोजी महापालिका मुख्यालयात हि निवडणूक होणार आहे. 

महिला बालकल्याण समिती सभापती व उपसभापती पदाचीही निवडणूक

९ नागरसेविकांच्या महिला आणि बाल कल्याण समिती सभापती पदासाठी देखील ४ मार्च रोजीच निवडणूक होणार आहे. समिती मध्ये भाजपाच्या ७ तर काँग्रेसच्या २ नगरसेविका आहेत. भाजपाच्या अनिता पाटील, सुरेखा सोनार, जया दत्ता, स्नेहा पांडे, हेमा बेलानी, रुपाली मोदी व दीप्ती भट तर काँग्रेसच्या रुबिना शेख, रिझवाना खान ह्या नगरसेविकांचा समिती मध्ये समावेश आहे. महापौर पदासाठी चर्चेत राहिलेल्या ज्येष्ठ नगरसेविका अनिता पाटील यांना निदान ह्या समितीचे सभापती पद मिळणार का? अशी चर्चा आहे. या शिवाय स्नेहा पांडे, दीप्ती भट सह सुरेखा सोनार, हेमा बेलानी, रुपाली मोदी यांची नावे देखील सभापती आणि उपसभापती पदासाठी चर्चेत आहेत.