जादा प्रवाशांची वाहतूक करणाऱ्या ७६७ रिक्षा चालकांवर कारवाई

ठाणे : कोरोनाचे वाढते संक्रमण लक्षात घेता जिल्हा प्रशासनाकडून सोशल डिस्टन्सिंगच्या निर्बंधांची कठोर अंमलबजावणी सुरू झाली आहे. त्यासाठी ठाणे शहर पोलीस आयुक्तालयाच्या कार्यक्षेत्रात दोनपेक्षा जादा प्रवाशांची वाहतूक करणाऱ्या रिक्षांवर बंदी घातलेली आहे. गेल्या दोन दिवसांमध्ये वाहतूक पोलिसांनी अशा ७६७ रिक्षाचालकांवर कारवाई करून ३ लाख ८७ हजार पाचशे रुपयांचा दंड वसूल केल्याची माहिती पोलीस उपायुक्त बाळासाहेब पाटील यांनी दिली.

गेल्या काही दिवसांपासून ठाणे जिल्ह्यात कोरोना रुग्णांच्या संख्येत वाढ होत आहे. त्यामुळे सामाजिक अंतराच्या नियमांचे काटेकोरपणे पालन करण्याचे आवाहन पोलीस आयुक्त विवेक फणसळकर यांनी केले आहे. कलम १४४ नुसार जमावबंदीही लागू असून तिची अंमलबजावणी योग्य पद्धतीने करण्याच्या सूचना पोलिसांना देण्यात आल्या आहेत. प्रशासनाकडून वारंवार आवाहन करुनही कोरोना संबंधीच्या नियमांचे नागरिकांकडून पालन करण्याचे प्रमाण कमी झाले आहे. रिक्षातही दोनच प्रवाशांना प्रवासाची मुभा असताना मीटरप्रमाणे चालणाऱ्या तसेच शेअर रिक्षामध्येही दोनपेक्षा अधिक प्रवाशांची सर्रास वाहतूक केली जात आहे. अशा जादा प्रवाशांची वाहतूक करणाऱ्या रिक्षाचालकांविरुद्ध १९ फेब्रुवारीपासून ही कारवाई पुन्हा सुरू करण्यात आली आहे.

* १९ फेब्रुवारी रोजी अशा ३४१ तर २० फेब्रुवारी रोजी ४२६ रिक्षाचालकांवर कारवाई करण्यात आली. त्यांच्याविरुद्ध साथ प्रतिबंधक कायदा १८८ तसेच मोटार वाहन कायदा कलम १७७ नुसार पाचशे रुपये दंड वसूल केला आहे. यामध्ये ११ चालकांनी जागीच दंडाची ही रक्कम भरली. उर्वरित चालकांकडून १ लाख ६८ हजार ५०० रुपयांच्या दंडाची वसुली केली जाणार असल्याची माहिती वाहतूक शाखेने दिली.

* फ्रंट सीटवरूनही सर्रास प्रवास

शेअर रिक्षांमध्ये अनेक रिक्षाचालक मागे तीन आणि पुढे आपल्या शेजारीच उर्वरित प्रवाशांना बसवून नेतात. अशा फ्रंट सीटवर प्रवासी बसविणाऱ्या १०१ चालकांच्या विरोधातही शुक्रवारी कारवाईचा बडगा उगारण्यात आल्याची माहिती सूत्रांनी दिली.