ठाणे : वंचित गटातील तसेच दुर्बल घटकातील बालकांना प्राथमिक शाळेचे इ १ ली ते ८ वी पर्यंतचे शिक्षण विनाशुल्क मिळावे यासाठी शासनाकडून दरवर्षी या घटकातील बालकांसाठी २५ टक्के मोफत ऑनलाईन प्रवेश प्रक्रिया राबविण्यात येते. जिल्ह्यातील पाच तालुके व सहा मनपातील आरटीई २५ टक्के प्रवेशासाठी ७ एप्रिल २०२१ रोजी लॉटरीची प्रक्रिया राज्यस्तरावरून पूर्ण करण्यात आली आहे. या लॉटरीमध्ये ठाणे जिल्ह्यातील एकूण ९ हजार ८८ अर्जांची निवड झाली आहे. आरटीई प्रवेश प्रक्रिया २०२१-२२ करिता ज्या बालकांची निवड झाली आहे. त्यांनी संबंधित शाळेत जाऊन ३० जून २०२१ पर्यंत प्रवेश निश्चित करावा, असे आवाहन शिक्षणाधिकारी (प्राथमिक) संतोष भोसले यांनी केले आहे.
निवड झालेल्या बालकांना शाळांमध्ये शिल्लक राहिलेल्या रिक्त जगानुसार पालकांना एसएमएसद्वारे प्रवेशाचा दिनांक कळविला जाईल. परंतु पालकांनी फक्त एसएमएसवर अवलंबून राहू नये. आरटीईपोर्टलवर प्रवेशाची तारीख या ठिकाणी आपला अर्ज क्रमांक टाकून प्रवेश घेण्याचा दिनांक पाहावा. कोरोना विषाणूचा प्रादुर्भाव लक्षात घेऊन शाळेत प्रवेश घेण्यासाठी पालकांनी गर्दी करू नये. सर्व शासकीय नियमांचे पालन करून प्रवेश प्रक्रियेत सहभागी व्हावे. तसेच प्रवेश घेण्यासाठी जाताना बालकांना आपल्या बरोबर नेऊ नये. प्रतीक्षा यादीतील बालकांच्या पालकांनी सध्या शाळेत जाऊ नये.