इन्स्टाग्राम हॅक झालंय? टेन्शन घेऊ नका, 'या' ३ स्टेप्स फॉलो कराल तर लगेच रिकव्हर होईल अकाउंट!

जर तुमच्या अकाउंटचा पासवर्ड आपोआप बदलला असेल किंवा लॉगिन करताना 'चुकीचा पासवर्ड' असा मेसेज येत असेल, तर समजून जा की तुमचे अकाउंट हॅकर्सच्या तावडीत सापडले आहे.

आजच्या काळात इंस्टाग्राम हे केवळ फोटो शेअर करण्याचे माध्यम राहिलेले नसून ती आपली डिजिटल ओळख बनली आहे. पण, विचार करा... एका सकाळी तुम्ही उठता आणि पाहता की तुमच्या अकाउंटवरून तुमच्या नकळत विचित्र पोस्ट किंवा मेसेज जात आहेत. हा अनुभव एखाद्या धक्क्यापेक्षा कमी नसतो. जर तुमच्या अकाउंटचा पासवर्ड आपोआप बदलला असेल किंवा लॉगिन करताना 'चुकीचा पासवर्ड' असा मेसेज येत असेल, तर समजून जा की तुमचे अकाउंट हॅकर्सच्या तावडीत सापडले आहे.

अशा परिस्थितीत घाबरून न जाता, खालील उपाययोजना करून तुम्ही तुमचे अकाउंट परत मिळवू शकता.

अकाउंट हॅक झाल्यास सर्वात आधी काय करावे?

१. पासवर्ड रिसेट करा: सर्वात आधी 'Forgot Password' या पर्यायावर क्लिक करा. तुमच्या रजिस्टर ईमेल किंवा मोबाईल नंबरवर एक लिंक येईल, त्यावरून तातडीने नवा पासवर्ड तयार करा. 

२. ईमेल तपासा: जर हॅकरने तुमचा ईमेल पत्ताच बदलला असेल, तर इंस्टाग्रामकडून तुम्हाला एक 'Security Alert' मेल आला असेल. त्या मेलमधील 'Revert this change' या पर्यायावर क्लिक करा. यामुळे हॅकरने केलेले बदल रद्द होतील. 

३. सर्व उपकरणांमधून लॉगआउट करा: पासवर्ड बदलताना 'Log out of all devices' हा पर्याय निवडा, जेणेकरून हॅकरच्या फोनमधून तुमचे अकाउंट आपोआप बंद होईल.

इंस्टाग्रामकडून मदत कशी मिळवाल?

जर तुम्ही लॉगिन करू शकत नसाल, तर इंस्टाग्राम ॲपमधील 'Need more help?' या पर्यायावर टॅप करा. येथे तुम्ही तुमचे अकाउंट हॅक झाल्याची तक्रार नोंदवू शकता. अनेकदा इंस्टाग्राम तुमची ओळख पटवण्यासाठी 'सेल्फी व्हिडिओ' किंवा इतर कागदपत्रे मागते. योग्य माहिती दिल्यास काही दिवसांत तुमचे अकाउंट तुम्हाला पुन्हा मिळू शकते.

भविष्यात हॅकिंग टाळण्यासाठी 'या' टीप्स फॉलो करा

मजबूत पासवर्ड: पासवर्डमध्ये अक्षरे, अंक आणि विशेष चिन्हांचा ($#@!) वापर करा. तसेच, तो पासवर्ड इतर कोणत्याही सोशल मीडिया किंवा वेबसाईटसाठी वापरू नका.

Two-Factor Authentication (2FA): हे फिचर तुमच्या अकाउंटसाठी सुरक्षा कवचासारखे काम करते. हे ऑन असल्यास, लॉगिन करताना तुमच्या मोबाईलवर एक ओटीपी (OTP) येईल, त्याशिवाय अकाउंट उघडणार नाही.

फिशिंग लिंक्सपासून दूर राहा: 'मोफत ब्लू टिक' किंवा 'बक्षीस लागल्याचे' आमिष दाखवणाऱ्या कोणत्याही अनोळखी लिंकवर क्लिक करू नका. हॅकर्स अनेकदा इंस्टाग्रामसारख्या हुबेहूब दिसणाऱ्या बनावट वेबसाईटवरून तुमची माहिती चोरतात.