TECH सेक्टरमध्ये खळबळ! Meta-Microsoft च्या प्लॅननं २३००० कर्मचाऱ्यांच्या नोकऱ्या धोक्यात

मायक्रोसॉफ्टने अशा मोठ्या प्रमाणावर स्वेच्छानिवृत्ती योजना सुरू करण्याची ही पहिलीच वेळ आहे.

नवी दिल्ली - टेक सेक्टरमध्ये पुन्हा एकदा नोकर कपातीचं संकट उभं राहिले आहे. जगातील आघाडीच्या तंत्रज्ञान कंपन्या आता खर्च कमी करणे आणि कृत्रिम बुद्धिमत्तेमध्ये (AI) मोठ्या प्रमाणावर गुंतवणूक करणे यांमध्ये संतुलन साधण्याचा प्रयत्न करत आहेत. मेटा आणि मायक्रोसॉफ्टने असे कठोर निर्णय घेतले आहेत, ज्यामुळे अंदाजे २३,००० कर्मचाऱ्यांच्या नोकऱ्यांवर परिणाम होऊ शकतो. या निर्णयावरून तंत्रज्ञान कंपन्या झपाट्याने बदलणाऱ्या काळाशी कशा जुळवून घेत आहेत हे दिसून येते.

मेटाचं मोठं पाऊल

मेटानं आपल्या कर्मचाऱ्यांना पाठवलेल्या एका नोटमध्ये स्पष्ट केलंय की, ते कंपनीतील कर्मचाऱ्यांची संख्या १०% ने कमी करण्याची योजना आखत आहेत. म्हणजेच अंदाजे ८,००० कर्मचाऱ्यांना आपली नोकरी गमावण्याची वेळ येऊ शकते. शिवाय कंपनी सध्या ६,००० रिक्त पदे भरणार नाही. ही कर्मचारी कपात २० मे पासून सुरू होण्याची शक्यता आहे. कामकाज सुधारण्यासाठी आणि एआय (AI) सारख्या मोठ्या गुंतवणुकीचा खर्च संतुलित करण्यासाठी हा निर्णय घेण्यात आला आहे असं कंपनीचे म्हणणे आहे. 

मायक्रोसॉफ्टची VRS ऑफर

दुसरीकडे मायक्रोसॉफ्टने आपल्या अमेरिकन कर्मचाऱ्यांसाठी मोठ्या प्रमाणावर ऐच्छिक स्वेच्छानिवृत्ती योजनेचा (voluntary buyout) प्रस्ताव दिला आहे. कंपनीच्या अमेरिकन कर्मचाऱ्यांपैकी अंदाजे ७% कर्मचारी या योजनेत समाविष्ट होऊ शकतात म्हणजेच अंदाजे ८,७५० लोकांना ही ऑफर मिळू शकते. मायक्रोसॉफ्टने अशा मोठ्या प्रमाणावर स्वेच्छानिवृत्ती योजना सुरू करण्याची ही पहिलीच वेळ आहे. कंपनी अशा कर्मचाऱ्यांना प्राधान्य देत आहे, ज्यांचे वय आणि सेवा कालावधी मिळून ७० वर्षे किंवा त्याहून अधिक आहे.

एआयमध्ये मोठी गुंतवणूक बनलं कारण

दोन्ही कंपन्या सध्या कृत्रिम बुद्धिमत्तेवर (artificial intelligence) अब्जावधी डॉलर्स खर्च करत आहेत. मायक्रोसॉफ्ट जगभरात नवीन डेटा सेंटर्स उभारत आहे आणि अलीकडेच जपान व ऑस्ट्रेलियामध्ये मोठ्या गुंतवणुकीची घोषणा केली आहे. मेटादेखील एआय (AI) प्रकल्प आणि भागीदारींवर विक्रमी रक्कम खर्च करण्याची तयारी करत आहे. परिणामी कंपन्या इतर खर्च कमी करण्यासाठी कर्मचारी कपात करण्यासारखी पावले उचलत आहेत.

कर्मचाऱ्यांची चिंता वाढली

दरम्यान, सतत होणाऱ्या कर्मचारी कपातीच्या बातम्यांमुळे कर्मचाऱ्यांमध्ये असुरक्षिततेचे वातावरण निर्माण झाले आहे. मेटाच्या अनेक विभागांमध्ये आधीच कर्मचारी कपात झाली आहे, ज्यामुळे इतर कर्मचाऱ्यांची चिंता आणखी वाढली आहे. मेटा आणि मायक्रोसॉफ्ट दोन्ही कंपन्या २९ एप्रिल रोजी त्यांचे तिमाही निकाल जाहीर करणार आहेत. गुंतवणूकदार आणि कर्मचारी कंपन्यांच्या पुढील पावलांवर लक्ष ठेवून असतील.