दुधनीत जुगार अड्ड्यावर धाड

पाच लाखांचा मुद्देमाल जप्त

लोकमत न्यूज नेटवर्क

अक्कलकोट : दुधनी (ता. अक्कलकोट) येथील एका सिनेमा थिएटरमध्ये सुरू असलेल्या जुगार अड्ड्यावर पोलिसांनी धाड टाकली. या कारवाईत जवळपास पाच लाखांच्या रोकडसह मुद्देमाल जप्त करण्यात आला.

१० सप्टेंबर रोजी साडेसहा वाजता दक्षिण पोलीस ठाण्याच्या पथकाने ही कारवाई केली.

दुधनी येथील शांभवी हॉटेलच्या बाजूला असलेल्या बालाजी सिनेमागृहात लाखो रुपयांचा जुगार खेळला जात असल्याची माहिती पोलीस अधीक्षक यांना मिळाली होती. अपर पोलीस अधीक्षक अतुल झेंडे व उपविभागीय पोलीस अधिकारी डॉ. संतोष गायकवाड यांच्या मार्गदर्शनाखाली दक्षिण पोलीस ठाण्याचे निरीक्षक प्रदीप काळे यांच्या पथकाने धाड टाकली. कारवाईदरम्यान कर्नाटकमधील कलबुर्गी जिल्ह्यातील १६ आरोपी, तीन मोटारसायकली, जीप, लाख रुपये रोख, सव्वा लाखाचे मोबाईल, पावणेतीन लाखांची वाहने असा जवळपास पाच लाखांचा मुद्देमाल जप्त केला.

रात्री उशिरापर्यंत दक्षिण पोलीस ठाण्यात गुन्हा दाखल करण्याचे काम सुरू होते. कारवाईत हवालदार अजय भोसले, संजय जाधव, श्रीकांत चव्हाण, अश्पाक मिय्यावाले आणि तीन होमगार्ड यांनी सहभाग नोंदवला.

-----------

फोटो : १० अक्कलकोट क्राईम

दुधनी येथे टाकलेल्या धाडीत जुगार खेळणाऱ्यांना दक्षिण पोलीस ठाण्याच्या पथकाने पकडून कारवाई करताना पोलीस निरीक्षक प्रदीप काळे आणि त्यांचे पथक.