सोलापूर : वळसंगहून सोलापूरकडे निघालेल्या कंटेनरने एसटी बस, तीन कार आणि दुचाकीस्वारांना धडक देत कुंभारीच्या वेशीत येऊन धडकला अन् तेथेच अडकून पडला. या थरारक अपघातात दोघांचा मृत्यू झाला, तर एकजण गंभीर जखमी झाला आहे. रात्री दहा वाजण्याच्या सुमारास घडलेल्या थरारक अपघातामुळे ग्रामस्थ भयभीत झाले. कुंभारीच्या ग्रामस्थांनी तर रास्ता रोको करून या घटनेचा संताप व्यक्त केला.
याबाबत अधिक माहिती अशी की, वळसंग येथे एका दुचाकीस्वाराला कट मारल्यामुळे तेथील ग्रामस्थांनी कंटेनर चालकाला मारहाण केली. ग्रामस्थांच्या तावडीतून कसेबसे सुटत कंटेनरचालक जोराने गाडी चालवत कुंभाराच्या दिशेने निघाला. मार्गात कंटेनरने चालकाने एसटी, तीन कार, दोन दुचाकी गाड्यांना धडक दिली. वळसंगला दिलेल्या धडकेत सकलेन मोहम्मद कासिम कुरेशी (वय २०, रा. वळसंग), रोहित चौगुले (मृत पूर्ण उपलब्ध झाले नाही) या दोन दुचाकीस्वारांचा जागीच मृत्यू झाला, तर कुंभारी येथे दोन दुचाकीस्वारांना धडक दिल्यामुळे सुभाष छपेकर, अमित छपेकर हे दोघे जखमी झाले. यातील सुभाष यांची प्रकृती चिंताजनक असल्याची माहिती स्थानिकांनी दिली. तत्पूर्वी, कुंभारी ग्रामस्थांनी कंटेनरचालकाला पकडून ठेवले.
दरम्यान, या घटनेच्या निषेधार्थ गावकऱ्यांनी कुंभारी रस्त्यावर रास्ता रोको केले. यामुळे काही काळ तेथे तणाव निर्माण झाला होता. घटनेची माहिती कळताच पोलिसांनी घटनास्थळी धाव घेत प्रकरण शांत करण्याचे प्रयत्न केले.