Video: जयपूर ‘पिंक एलिफंट’ फोटोशूट वादात; 'त्या' हत्तीचा महिनाभरापूर्वी मृत्यू, कारण...

फोटोशूटसाठी हत्तीला गुलाबी रंग लावला, वाद वाढल्यानंतर वन विभागाने दिले चौकशीचे आदेश

जयपूर: राजस्थानच्या जयपूरमध्ये रशियन फोटोग्राफरच्या ‘पिंक एलिफंट’ फोटोशूटवरून सुरू झालेला वाद अजूनही थांबलेला नाही. सोशल मीडियावर या फोटोशूटचे फोटो आणि व्हिडिओ व्हायरल झाल्यानंतर आता एक महत्त्वाची माहिती समोर आली आहे. या फोटोशूटमध्ये वापरलेली मादी हत्तीण ‘चंचल’ हिचा सुमारे एक महिन्यापूर्वी मृत्यू झाला होता. मात्र अधिकाऱ्यांनी स्पष्ट केले आहे की, तिच्या मृत्यूचा या फोटोशूटशी कोणताही संबंध नाही.

नोव्हेंबर २०२५ मध्ये झालेला फोटोशूट

हे फोटोशूट रशियन आर्ट फोटोग्राफर जुलिया बुरुलेवा यांनी नोव्हेंबर २०२५ मध्ये केले होते. मात्र अलीकडेच या शूटचे फोटो आणि व्हिडिओ सोशल मीडियावर व्हायरल झाल्यानंतर हा विषय चर्चेत आला. या फोटोशूटमध्ये एका मॉडेलसोबत हत्तीला चमकदार गुलाबी रंगात रंगवून सादर करण्यात आले होते. यामुळे इंटरनेटवर मोठी चर्चा आणि वाद निर्माण झाला.

‘चंचल’च्या मृत्यूमुळे प्रकरण अधिक संवेदनशील

मिळालेल्या माहितीनुसार, फोटोशूटमध्ये दिसणाऱ्या ‘चंचल’ या हत्तीणीचे वय सुमारे ७० वर्षे होते. हत्तींसाठी हे वय जास्त मानले जाते. स्थानिक नागरिक आणि अधिकाऱ्यांच्या माहितीनुसार तिचा मृत्यू नैसर्गिक कारणांमुळे झाला आहे. सध्या तरी फोटोशूट आणि तिचा मृत्यू यांचा संबंध असल्याचा कोणताही पुरावा आढळलेला नाही. मात्र व्हिडिओ व्हायरल होणे आणि मृत्यूची बातमी एकाच वेळी समोर आल्याने लोकांच्या प्रतिक्रिया अधिक तीव्र झाल्या आहेत.

‘पिंक एलिफंट’ फोटोशूट कसे झाले?

हे फोटोशूट जयपूरमधील हाथी गाव परिसरात करण्यात आला होता. हाथी गाव समितीच्या माहितीनुसार, हत्तीला होळीमध्ये वापरल्या जाणाऱ्या गुलालाने रंगवण्यात आले होते आणि काही वेळानंतर तो रंग धुवून काढण्यात आला. आयोजकांच्या मते, हत्तीला कोणतीही इजा झाली नाही. शूट पूर्णपणे सुरक्षित पद्धतीने करण्यात आले होते.

सोशल मीडियावर विविध प्रतिक्रिया

या फोटोशूटवरून सोशल मीडियावर लोकांचे दोन गट पडले आहेत. एका गटाचे मत आहे की, हे क्रिएटिव्ह आणि आर्टिस्टिक फोटोशूट आहे. यातून जयपूरची ओळख दाखवण्याचा प्रयत्न केला असून, याला कलात्मक प्रोजेक्ट म्हणून पाहावे. तर, दुसऱ्या गटाच्या मते या फोटोशूटसाठी हत्तीचा चुकीचा वापर केला आहे. यासाठी योग्य परवानगी घेतली होती का? हत्तीच्या  सुरक्षिततेची काळजी घेतली होती का? अशाप्रकारचे प्रश्न विचारले जात आहेत. 

वन विभागाने दिले चौकशीचे आदेश

वाद वाढल्यानंतर राजस्थान वन विभागाने या प्रकरणाची चौकशी सुरू केली आहे. वन्यजीव संरक्षण नियमांचे उल्लंघन झाले का, याची तपासणी केली जाणार आहे. अधिकाऱ्यांनी सांगितले की, नियमांचे उल्लंघन आढळल्यास कठोर कारवाई होईल.