नीलेश राणेंना बळीचा बकरा केला जातोय, शिंदेसेनेचे नेते का बोलत नाहीत; मंत्री नितेश राणेंचा सवाल

Local Body Election: राणे विरोधात कटकारस्थाने कोणी रचली, दीपक केसरकरांनी उत्तर द्यावे  

सावंतवाडी : नीलेश राणेंचा बळीचा बकरा केला जातोय. उद्योगमंत्री उदय सामंत आमदार दीपक केसरकर यांच्यासह अन्य शिंदेसेनेचे नेते का बोलत नाहीत ? असा सवाल मत्स्य व बंदर विकास मंत्री नितेश राणेंनी केला. नारायण राणे यांना कटकारस्थान करून संपविले जाते म्हणणाऱ्यांनी २०१४ ते २०२४ पर्यत राणे कुटुंबांविरोधात षडयंत्र कोणी रचले, कोणी गुन्हे दाखल केले, कोण विरोधात वागले हे जनतेला माहीत असून केसरकर यांचे म्हणणे निव्वळ हास्यास्पद असल्याची टीका राणे यांनी केली.

मंत्री नितेश राणे यांनी शनिवारी राजवाडा येथे प्रमुख पदाधिकाऱ्यांची बैठक घेतली. त्यानंतर ते पत्रकार परिषदेत बोलत होते. यावेळी लखमराजे भोंसले, माजी नगराध्यक्ष बबन साळगावकर, शहराध्यक्ष सुधीर आडिवरेकर, मंदार कल्याणकर आदी उपस्थित होते.

मंत्री राणे म्हणाले, सावंतवाडी, वेंगुर्ले, कणकवली व मालवण नगरपरिषद निवडणूक प्रचार अंतिम टप्प्यात आला आहे. भाजप म्हणून आम्ही ही निवडणूक विकासाच्या मुद्यावर लढत आहोत. मतदारांपर्यंत 'डोअर टू डोअर' आम्ही पोहचत असून विकासाच्यामुद्यावर ही निवडणूक लढवली जात आहे. आम्ही सावंतवाडीची सुंदरवाडी ही ओळख अजून भक्कम करण्याचा काम श्रध्दा सावंत भोंसले यांच्या नेतृत्वाखाली करण्यात येणार आहे. 

दरम्यान, केसरकर आपल्या आजारपणावर बोलतात पण आजारपण व निवडणुकीचा संबंध काय आहे? राजघराण्याच्या आशीर्वादान पुढचा प्रवास चांगला करण्यासाठी आमचा हेतू आहे. राजघराण्याला पाठिंबा नाही असं दीपक केसरकर यांनी सांगावं. केसरकर लवकर ठणठणीत व्हावेत हीच आमची इच्छा आहे असं त्यांनी सांगितलं. 

वाचा- माझे लढे व्यक्तीविरुद्ध नव्हते, तर..; मंत्री नितेश राणे यांना दीपक केसरकरांचे प्रत्युत्तर

आम्हाला सगळं माहीत आहे 

केसरकर म्हणतात राणेना संपविण्याचा डाव आहे. पण २०१४ ला नारायण राणेंची प्रतिमा खराब करण्याची सुरूवात केली ? नीलेश राणेंच्या विरोधात खासदारकीला शडडू कुणी ठोकला ? आज तेच म्हणातात राणेंच्या विरोधात कट रचला जातो, हे हास्यास्पद आहे. भाजपने आम्हाला आशीर्वाद, पद दिली. नारायण राणेंना केंद्रीय मंत्री करण्याचं काम भाजपने केल. आम्हाला कोणी जेलमध्ये टाकलं ? केसीस घातल्या हे सगळं माहित आहे असा टोला केसरकर हाणला‌.