करुळ घाटात सिमेंटचा ट्रक दरीत कोसळला, भीषण अपघातात दोन जणांचा मृत्यू

Accident News: करुळ घाट उतरुन वैभववाडीकडे येणारा सिमेंटच्या पिशव्या भरलेला ट्रक घाटातील ३०० फूट दरीत कोसळला. या भीषण अपघातात दोघांचा जागीच मृत्यू झाला. ही दुर्घटना गुरुवारी(ता.२) पहाटे सुमारे ५ वाजण्याच्या सुमारास घडली.

सिंधुदुर्ग - करुळ घाट उतरुन वैभववाडीकडे येणारा सिमेंटच्या पिशव्या भरलेला ट्रक घाटातील ३०० फूट दरीत कोसळला. या भीषण अपघातात दोघांचा जागीच मृत्यू झाला. ही दुर्घटना गुरुवारी(ता.२) पहाटे सुमारे ५ वाजण्याच्या सुमारास घडली.

कोल्हापूरहून सिमेंटची पोती भरुन निघालेला ट्रक (क्रमांक केए:२८; एए-५५४५) करुळ घाटातून वैभववाडीकडे येत होता. पहाटे ५ वाजण्याच्या सुमारास सिमेंटचा हा ट्रक सुमारे ३०० फूट खोल दरीत कोसळला. या अपघाताची माहिती मिळताच वैभववाडीचे पोलिस निरीक्षक मनोज सोनवलकर व पोलिस कर्मचारी तत्काळ घटनास्थळी अपघातस्थळी पोहोचले. तसेच बचावकार्यासाठी करुळ येथील सह्याद्री वनजीव रक्षक पथकाचे हेमंत पाटील व त्यांचे सहकाऱ्यांना पाचारण केले.

अपघातस्थळी पोहोचताच दरीत उतरुन बचावकार्य सुरु केले. परंतु, तत्पूर्वीच ट्रकसोबत दरीत कोसळलेले दोघांचे मृतदेह आढळले. पोलिस व सह्याद्री जीवरक्षक पथकाने मोठ्या प्रयत्नांनंतर दोन्ही मृतदेह दरीतून बाहेर काढले. आले. अपघाताचे कारण अद्याप समोर आले नसून, वैभववाडी पोलीस अधिक तपास करत आहेत.