इमारतीवरून सिमेंटचा ब्लॉक डोक्यात पडून कामगाराचा मृत्यू, साताऱ्यातील घटना

तातडीने खासगी रुग्णालयात दाखल करण्यात आले. मात्र, उपचारादरम्यान त्याचा मृत्यू झाला

सातारा : बांधकाम सुरू असणाऱ्या इमारतीवरून सिमेंटचा ब्लाॅक डोक्यात पडून एका परप्रांतीय कामगाराचा मृत्यू झाला. ही दुर्दैवी घटना दि. २८ रोजी सायंकाळी साडेसहा वाजता सातारा बसस्थानक परिसरात घडली.

अनिल अल्लू माैर्य (वय २९, सध्या रा. दिव्यनगरी सातारा, मूळ रा. बलरामपूर उत्तरप्रदेश) असे सिमेंटचा ब्लाॅक डोक्यात पडून मृत्यू झालेल्या कामगाराचे नाव आहे. याबाबत पोलिसांनी दिलेली माहिती अशी की, सातारा बसस्थानक परिसरात एका इमारतीचे बांधकाम सुरू आहे. या बांधकामावर अनिल माैर्य काम करत होता. 

शनिवार, दि. २८ रोजी इमारतीवरून अचानक त्याच्या डोक्यात सिमेंटचा ब्लाॅक पडला. यामध्ये तो गंभीर जखमी झाला. त्याला तातडीने साताऱ्यातील खासगी रुग्णालयात दाखल करण्यात आले. मात्र, उपचारादरम्यान रात्री त्याचा मृत्यू झाला. याबाबत खासगी हाॅस्पिटलच्या महिला डाॅक्टरांनी शाहूपुरी पोलिस ठाण्यात खबर दिली आहे. पोलिस उपनिरीक्षक साबळे हे अधिक तपास करीत आहेत.