सातारा : खुलेआमपणे स्वार्थासाठी खुर्चीला चिटकून राहणारी मी नाही असा खोटा आव आणणाऱ्यांचा बुधवार उजाडून गेला तरी कथित राजीनामा आलेला नाही. त्यांनी केलेले तथ्यहीन आरोप हे निराधार आहेतच; परंतु त्रागा करताना त्यांनी त्यांच्या मूळ संस्कृतीचे प्रदर्शन केले आहे. त्यांच्या बोलण्यामुळे सर्वसामान्य सातारकरांना तथाकथित बुद्धिमत्तेचा स्तर समजला,’ असा घणाघात नगराध्यक्षा माधवी कदम यांनी नगरसेविका सिद्धी पवार यांच्यावर केला आहे.
सिद्धी पवार यांनी सातारा विकास आघाडीवर बेलगाम आरोप करताना सार्वजनिक बांधकाम सभापतिपदाचा राजीनामा देत असल्याचे वक्तव्य शनिवारी केले होते. पवार यांचे सर्व आरोप नगराध्यक्षांनी प्रसिद्धीपत्रकाद्वारे खोडून काढले आहे.
त्या म्हणाल्या, ‘सातारा नगरपरिषदेत कोणीही जादू करीत नाही. तथापि विकासाची कामे जादू प्रमाणे लगेच झाली पाहीजे असे जर त्यांना वाटत असेल तर त्यांना जादूगारच भेटला पाहिजे. तांत्रिक मंजुरी, प्रशासकीय मंजुरी, निधीची तरतूद, शासकीय योजनेत संबंधित काम मंजूर होणे, त्यापुढे निविदा, संविदा, कार्यादेश इत्यादी अनेक टप्पे पार पाडल्याशिवाय कोणी कितीही जादूटोण्याचा, काळ्या जादूचा आणि अघोरी उपायांचा प्रयत्न केला तरी ते शक्य होत नाही. त्यामुळे सिद्धी पवार यांनी ज्या अटल स्मृती उद्यानाचा व इतर विषय होत नाही म्हणून राजीनामा देण्याची धमकी दिली होती, त्या भारतरत्न माजी पंतप्रधान अटलबिहारी वाजपेयी यांच्या नखाइतका तरी सुसंस्कृतपणा आत्मसात करावा आणि मगच आपली जीभ टाळ्याला लावावी.
खासदार उदयनराजे भोसले यांनी लोकसभा सदस्यत्वाचा राजीनामा दिला होता. त्यांनी लोकसभे अंतर्गत स्थापित असलेल्या कुठल्या कमिटीचा राजीनामा दिला नव्हता. खा. उदयनराजे भोसले यांचा आदर्श घेऊन, सिद्धी पवार यांनी मात्र सभापतिपदाचा म्हणजेच एका कमिटीचा राजीनामा देत आहे, असे त्या पत्रात नमूद केले आहे. त्यांचा हा सभापतिपदाचा राजीनामा प्रत्यक्षात नगरपरिषदेकडे प्राप्त नाही. राजीनाम्याबाबत त्या कोणाशी बरोबरी करायला जात आहेत याचेही भान त्यांना राहिलेले नाही.
(चौकट)
.. असे आरोप अशोभनीय
सिद्धी पवार यांच्या प्रभाग क्रमांक १७ मध्ये आजवर खा. उदयनराजे भोसले यांच्या मार्गदर्शनखाली एकूण ३७ कामे मंजूर करण्यात आलेली आहेत. पैकी २० कामे पूर्ण झालेली आहेत. नगरपरिषदेच्या वॉर्ड निधीमधून ५१ लाख ३४ हजार रुपयांची कामे झालेली आहेत. वॉर्डनिधी व्यतिरिक्त १ कोटी ८५ लाख २२ हजार रुपयांची कामे मंजूर आहेत. दोन्ही मिळून २ कोटी ३६ लाख ५६ हजार रुपयांची कामे पूर्णत्वास जात असताना, कामे होत नाहीत, कामे अडवली जातात, जादूगार जादू करतात व त्यामुळे कामे होत नाहीत असे निराधार आरोप करणे जबाबदार लोकप्रतिनिधींना शोभत नाही, असा टोलाही नगराध्यक्षा माधवी कदम यांनी लगावला आहे.