वडिलांच्या जागी आईचं नाव!

मतदार हतबल : निवडणूक याद्यांमधला घोळात घोळ संपेना

सागर गुजर - सातारा -विधानसभा निवडणुकीच्या अनुषंगाने तयार केलेल्या मतदारयाद्यांमध्ये वडिलांच्या नावाच्या रकान्यात चक्क आईचे नाव लिहिण्यात आलेय. यासह अनेक चुकांची जंत्रीच विद्यमान मतदारयाद्यांमध्ये असल्याने या चुकांच्या दुरुस्तीत गुंतलेल्या ‘बीएलओं’ची भलतीच तारांबळ उडताना पाहायला मिळत आहे.लोकसभा निवडणुकीमध्ये अनेक मतदारांना केवळ यादीत नाव नाही म्हणून मतदानाच्या अधिकारापासून वंचित राहावे लागले होते. मधल्या काळात काही सुधारणा होईल, अशी अपेक्षा होती. मात्र, तीही फोल ठरली आहे. सध्या तयार असणाऱ्या मतदारयाद्या प्रत्येक ‘बीएलओं’कडे देण्यात आल्या आहेत. या याद्यांमध्ये असणाऱ्या चुकांची दुरुस्ती करताना हे कर्मचारी अक्षरश: वैतागून गेले आहेत. अनेक याद्यांमध्ये मतदारांचे फोटो नाहीत. अनेक ठिकाणी मतदाराचा फोटो आणि केवळ नाव आहे, पत्त्याचा पत्ताच नाही.कवी नारायण सुर्वे यांनी मार्मिक टिप्पणी केली आहे. पोराच्या बापाचं नाव विचारल्यानंतर ‘लिव्हा मास्तर तुमचंच नाव!,’ असं सांगणाऱ्या हताश मातेची गूढ संमती मास्तरांचे डोके चक्रावणारी होती. तीच अवस्था सध्या निवडणुकीच्या कामावर असणाऱ्या ‘बीएलओ’ अधिकाऱ्यांची झाली आहे. मतदारयादीत मतदाराचे नाव व त्याच्या वडिलांच्या नावाचा उल्लेख असतो. वडिलांच्या नावावर चक्क आईचे नाव आहे. फोटो चुकीचे आहेत. पुरुष मतदार असेल, तर लिंगाच्या रकान्यात ‘स्त्री’ असा उल्लेख आहे. तर स्त्री मतदार असेल, तर लिंगाचा उल्लेख ‘पुरुष’ असा करण्यात आला आहे.मतदारयादीत नाव समाविष्ट करताना फॉर्म क्र. ६ सविस्तर भरून घेतला जातो. या फॉर्मसोबत पत्त्यासाठी रेशनकार्ड, वयाचा पुरावा म्हणून शाळा सोडल्याचा दाखला सोबत घेतला जातो. ही कागदपत्रे दिली असतानाही निवडणूक विभागातील कर्मचारी मतदार याद्यांमध्ये चुका करतात. सध्या ‘बीएलओं’ना मतदारांच्या घराचे उंबरे झिजवावे लागत आहेत. एकंदरीत, लोकसभा निवडणुकीच्या अनुभवातून काहीच न शिकल्याने तेच घोळ यादीत ठाण मांडून आहेत. (प्रतिनिधी)पत्ताच झाला बेपत्तामतदार याद्यांमध्ये अनेक मतदारांच्या पत्त्याचाच उल्लेखच नाही. सदर बझारमधील एखाद्याचे नाव असेल तर घर क्रमांक, घर कुठे आहे ते ठिकाण दाखविणारी जागा याचा उल्लेखच नाही. आता मतदार स्लिप द्यायची झाल्यास ती कशी द्यायची हा प्रश्न आहे. त्यातच नवीन मतदारांची नोंद करून दिल्यास त्यांची नावेही या मतदारयाद्यांमध्ये घेतली जात नाहीत, असे एका कर्मचाऱ्याने नाव न सांगण्याच्या अटीवर सांगितले.