कोपर्डे हवेली : सैदापूर येथील शासकीय औद्योगिक प्रशिक्षण संस्थेची वीज जोडणी पंधरा दिवसांपूर्वी वीजबिल थकीत असल्याने तोडण्यात आली होती. त्यानंतर जिल्हा परिषद सदस्य सागर शिवदास व भाजप युवा मोर्चाने याबाबत आंदोलनाचा इशारा दिला होता. त्याची दखल घेत केवळ सहा तासात वीज जोडणी पूर्ववत जोडण्यात आल्याने पालक आणि विद्यार्थ्यांमधून समाधान व्यक्त होत आहे.
औद्योगिक प्रशिक्षण संस्थेतील वीज तोडण्यात आल्याने कौशल्य विकास यांत्रिकरण विभाग बंद होता. परिणामी, विद्यार्थ्यांचे नुकसान होत होते. काही विद्यार्थी याठिकाणी निवास करतात. त्यांना विजेअभावी अंधारात चाचपडावे लागत होते. सध्या उन्हाळ्याचे दिवस असल्याने उकाड्याचा आणि डासांचा नाहक त्रास सहन करावा लागत होता. येथील अंधाराचा फायदा घेऊन चोरीसारखे प्रकारही घडत होते. त्यामुळे तातडीने वीज जोडणी पूर्ववत द्यावी, न जोडल्यास संस्थेसमोर आंदोलन करु, असा इशारा भाजप युवा मोर्चाने दिला होता. जिल्हा परिषद सदस्य सागर शिवदास यांनी याबाबतचे निवेदन प्रभारी प्राचार्य एस. आय. भोसले यांना दिले होते. यावेळी पैलवान अक्षय चव्हाण, किशोर साळवे, श्रीकांत झेंडे, प्रशांत कदम आदी उपस्थित होते.
दरम्यान, भाजपचे प्रदेशाध्यक्ष चंद्रकांत पाटील यांचे सचिव निवास जाधव यांनी गृहराज्यमंत्री व कौशल्य विकासमंत्री शंभुराज देसाई तसेच अल्पसंख्याक व कौशल्य विकासमंत्री नवाब मलिक यांच्याशी याबाबत चर्चा केली होती. अखेर संबंधित विभागाने तातडीने कार्यवाही करुन वीज जोडणी पूर्ववत केली.