शिंदेवाडी परिसरात बिबट्याचा वावर नित्याचा बनला आहे. परिसरात त्याच्याकडून हल्ल्याचे सत्र सुरूच आहे. विशेषत: पाळीव प्राण्यांना त्याने लक्ष केले आहे. भरवस्तीत घुसण्यापर्यंत त्याची मजल गेली आहे. गत आठवड्यात रात्री एका पाळीव श्वानाला त्याने ठार केले. शिंदेवाडीतील शिवाजी दादू शिंदे या शेतकऱ्याचे ते श्वान होते. ही शिकार बिबट्याने अक्षरश: झाडावर नेऊन लटकवली होती. दोन दिवसांपूर्वी रात्री घडलेला हा प्रकार ग्रामस्थांच्या निदर्शनास आल्यानंतर भीतीचे वातावरण निर्माण झाले. तत्पूर्वी त्या वस्तीत बिबट्याने पाळीव प्राण्यांवर अनेकदा हल्ले चढवले आहेत.
दोन वर्षांपूर्वी येथील एका शेतकऱ्याच्या शेळ्याही त्याने ठार केल्या होत्या. त्यानंतर गावठाण परिसरातील शेतकऱ्यांना बिबट्याचे दर्शन नेहमीच घडते. पैलवान तानाजी शिंदे, उत्तम शिंदे यांनी बिबट्याला ठिकठिकाणी पाहिले आहे. गत आठवड्यात तर भरवस्तीत त्याने शिरकाव केल्याने भीतीचे वातावरण निर्माण झाले आहे. घटनास्थळी तसेच झाडाच्या खोडावर बिबट्याच्या पायाच्या नखांचे ओरखडे दिसून येत आहेत. या घटनेची माहिती वन विभागाला दिल्यानंतर अधिकारी व कर्मचाऱ्यांनी त्याठिकाणी भेट देऊन पाहणी केली. ग्रामस्थांनी दक्षता बाळगण्याचे आवाहन करण्यात आले आहे.