Satara: यशवंत बँक अपहारप्रकरणी एकास अटक, २९ डिसेंबरपर्यंत पोलिस कोठडी; ईडी'ने पाच ठिकाणी टाकले होते छापे

या प्रकरणात अंमलबजावणी संचालनालय (ईडी)कडून मंगळवार, दि. २३ रोजी फलटण आणि कराड येथे पाच वेगवेगळ्या ठिकाणी छापे टाकण्यात आले

सातारा/कराड : फलटण (जि.सातारा) येथील यशवंत सहकारी बँकेत झालेल्या तब्बल ११२ कोटींच्या आर्थिक अपहारप्रकरणी तपासाचा फास अधिक आवळत सातारा आर्थिक गुन्हे शाखेने शेखर चरेगावकर यांचा दत्तक भाऊ शौनक उर्फ विठ्ठल गोविंद कुलकर्णी (रा.पुणे) याला अटक केली आहे. त्याला कराड न्यायालयात हजर केले असता, न्यायालयाने त्याला सोमवार, दि. २९ डिसेंबरपर्यंत पोलिस कोठडी सुनावली आहे.

दरम्यान, या प्रकरणात अंमलबजावणी संचालनालय (ईडी)कडून मंगळवार, दि. २३ रोजी पहाटेपासून फलटण आणि कराड येथे पाच वेगवेगळ्या ठिकाणी छापे टाकण्यात आले. या छापासत्रात सुमारे १६ तासांहून अधिक काळ कागदपत्रांची सखोल तपासणी करण्यात आली. मध्यरात्रीनंतर उशिरापर्यंत सुरू असलेल्या या कारवाईत ईडीच्या अधिकाऱ्यांनी या अपहार प्रकरणाशी संबंधित महत्त्वाची कागदपत्रे ताब्यात घेतली असून, पाच जणांना नोटिसा बजावण्यात आल्याचे समजते.

याबाबत १२ ऑक्टोबर रोजी कराड शहर पोलिस ठाण्यात यशवंत बँकेतील ११२ कोटींच्या अपहारप्रकरणी शेखर चरेगावकर यांच्यासह सुमारे ५० जणांविरोधात गुन्हा दाखल केला होता. या प्रकरणात बँकेच्या ठेवीदारांनी खासदार मेधा कुलकर्णी यांच्यासह केंद्रीय गृहमंत्री अमित शहा यांची भेट घेत, संपूर्ण अपहार प्रकरणाची ईडीमार्फत सखोल चौकशीची मागणी केली होती. त्यानंतरच ईडीने फलटण, कराड आणि परिसरात छापासत्र राबवून बँकेच्या शाखांमध्ये जाऊन चौकशी करत आर्थिक व्यवहार तपासले आहेत.