लोणंद : सातारा-फलटण जाणाऱ्या मार्गावर प्रसाद स्टोन क्रशरजवळ असणाऱ्या निर्जन खिंडीत काही दिवसांपासून ट्रकचालकांना रस्त्यावर लाल रंगाचा जॅक ठेवून त्याचे आमिष दाखवून लुटण्याचे प्रकार घडत होते. याप्रकरणी एक टोळी लोणंद पोलिसांनी गजाआड केली.
या प्रकरणाचा तपास करण्यासाठी लोणंदचे सहायक पोलीस निरीक्षक संतोष चौधरी, उपनिरीक्षक गणेश माने व ठाणे अंमलदार एक महिन्यापासून रात्र गस्त करून गोपनीय माहिती मिळवत होते. त्यानुसार दि. ११ रोजी रात्री सातारा ते फलटण जाणाऱ्या रोडवर पुनर्वसन येथे लाल जॅक व काही संशयित इसम असल्याची माहिती समजली. त्यानुसार सापळा रचून ही कारवाई केली. पोलिसांची चाहूल लागताच त्यांनी पळून जाण्याचा प्रयत्न केला. पोलिसांनी पाठलाग करून अटक केली.
या दरोड्यातील रामदास बापू काळे, पिंटू शहाजी काळे, दशरथ लक्ष्मण काळे, तानाजी अशोक काळे, सचिन अशोक काळे (रा. पारा ता. वाशी जि. उस्मानाबाद) अशी अटक केलेल्यांची नावे असून त्यांच्याकडून कोयता, दांडके, मिरचीपूड, दोरी, स्क्रू ड्रायव्हर, रॉड जप्त केले. ते ऊसतोडीसाठी आले असून ते दिवसभर काम करून रात्रीचे अशा प्रकारचे गुन्हे करण्यास सरसावले होते.