केंद्र शासनाने ‘सिरम कोव्हीड शिल्ड’ लसीला परवानगी दिल्याने पहिला टप्पा यशस्वी करण्यासाठी प्रशासनाने तयारी केली असून या लसीच्या पहिल्या ‘ड्राय रन’ चाचणीची सुरुवात मल्हारपेठमध्ये करण्यात आली. लस पूर्णत: सुरक्षितता बाळगून देण्यात येणार असून पहिल्या टप्प्यात आरोग्य कर्मचारी, दुसऱ्या टप्प्यात पोलीस कर्मचारी, महानगरपालिका नगरपालिका, महसूल विभाग व जिल्हा परिषदेतील सर्व शासकीय विभागातील कर्मचाऱ्यांची नोंदणी करण्यात येत आहे. नोंदणी करताना आधारकार्ड, पॅनकार्ड सक्तीचे करण्यात आले आहे. आधारकार्ड नोंदणीकृत केल्यानंतर लाभार्थीच्या मोबाईलवर नोंदणी झालेला मेसेज आल्यानंतरच त्यांची अधिकृत नोंदणी ग्राह्य धरली जाणार आहे.
पहिल्या टप्प्यात लस देण्यासाठी तीन सेंटर उभारण्यात येणार आहेत. यात वेटिंगरूम, व्हॅक्सिन तर तिसऱ्या लसीनंतर ऑब्झर्वेशन सेंटर असणार आहे. यामध्ये लसीकरण केलेल्या व्यक्तीला लसीकरणकाळात काहीकाळ कोणताही त्रास होत असल्यास इतर अत्यावश्यक सोयी-सुविधांचा वापर केला जाणार आहे. यानंतरच संबंधितांना घरी सोडण्यात येणार आहे.
यावेळी आरोग्य विभागातील डॉ. नयन भोई, डॉ. ज्ञानेश्वर नाथ, अन्सार मुजावर, परविन मुजावर, जिल्हा लसीकरण सहनियंत्रक डॉ. सागर आदी उपस्थित होते.
फोटो : १४केआरडी०१
कॅप्शन : मल्हारपेठ, ता. पाटण येथील प्राथमिक आरोग्य केंद्रात कोरोना लसीच्या चाचणीचा ड्राय रन घेण्यात आला. (छाया : सुनील साळुंखे )