लोकमत न्यूज नेटवर्क
सातारा : संपूर्ण राज्यभरात अंगणवाडीचा कारभार पारदर्शक करण्यात आला आहे. या नवीन मोहिमेच्या माध्यमातून अंगणवाडी ताईंना थेट स्मार्ट फोन देण्यात आले आहेत. त्यासाठी प्रशिक्षणही पार पडले, मात्र, या मोबाईलवर माहिती भरल्यानंतरही संबंधित विभागापर्यंत माहिती पोहोचत नसल्याने अंगणवाडी ताईंची डोकेदुखी वाढली आहे.
जिल्ह्यात ४ हजार ८१० अंगणवाड्या बाहेत. त्यामध्ये तीन लाखाहून अधिक लाभार्थी आहेत. त्यांचा आहार वितरित करण्यापासून ते प्राथमिक शिक्षण देण्याची जबाबदारी अंगणवाडी ताईंवर आहे. मात्र, तक्रारी अधिक असल्याने त्यांना स्मार्ट फोन देण्यात आला आहे. स्मार्ट फोनवर रोज उपस्थित विद्यार्थ्यांचा फोटो टाकायचा आहे. याशिवाय आहार वाटपाची माहिती आणि लाभार्थींचा फोटोही टाकावा लागतो. ऑनलाईन कामकाजानंतरच अंगणवाडी ताईंची उपस्थिती आणि वेतन निश्चित होते. मात्र, सर्व्हरमुळे संपूर्ण ऑनलाईन कामकाज ठप्प झाले आहे. त्याला पर्याय म्हणून ऑफलाईन काम करावे लागत आहे. या कामाच्या वाढत्या व्यापाने अंगणवाडी ताईंची डोकेदुखी वाढली आहे. यामुळे प्रशासनाला कामकाज करताना अडथळे येत आहेत.
अडचणी काय!
अंगणवाडीचा कारभार पारदर्शक करण्यासाठी अंगणवाडी ताईंना मोबाईलचे वाटप करण्यात आले. या मोबाईलमध्ये संपूर्ण माहिती भरणे अपेक्षित होते. त्यानुसार माहिती मोबाईलमध्ये डाऊनलोड होते. मात्र, संबंधित कार्यालयापर्यंत पोहोचतच नाही.
कामकाज सुधारणार
अंगणवाडी ताईंना मोबाईल देण्यात आले आहेत. त्यावरच शासकीय कामकाज पार पाडले जाते. मात्र, सध्या सर्व्हरचे काम सुरू असल्याने माहिती अपलोड होत नाही. हे कामकाज सुधारण्यासाठी वरिष्ठ स्तरावर प्रयत्न सुरू आहेत.
- मनोज ससे,
उपमुख्य कार्यकारी अधिकारी, महिला व बालकल्याण
मोबाईलवरून कोणती कामे करावी लागतात...
अंगणवाडीत येणाऱ्या विद्यार्थ्यांची उपस्थिती नोंदविणे
आहार वाटपाची माहिती अद्यावत भरणे
माता बैठक आणि समुपदेशनाची माहिती भरणे
बालकांचे वजन आणि गरोदर मातांचे वजन भरणे
लाभार्थ्यांच्या घरी भेटी देणे
गरोदर मातांच्या लसीकरणाची माहिती देणे
संभाव्य बाळंतपणाच्या तारखा दाखल करणे
गावातील सर्वेक्षण नोंद करणे
महिलांच्या आरोग्याच्या तपासण्यांची माहिती दाखल करणे
विद्यार्थ्यांचे फोटो रोजच्या हजेरीपटासह पाठविणे
दिवसभरातील कामकाजाचे नियोजन पाठविणे
पॉईंटर
४८१० जिल्ह्यातील अंगणवाड्या
४८१० अंगणवाडी सेविका
४८१० मोबाईलचे वाटप