इस्लामपूरमध्ये ट्रामा सेंटर उभारणार

दीपक सावंत : इस्लामपुरात महाआरोग्य शिबिराचे उद्घाटन

इस्लामपूर : महिला, मुली आणि मूकबधिरांवरील उपचारासह लठ्ठपणाविरोधी अभियान राज्यभरात राबविणार असल्याचे वैद्यकीय शिक्षण आणि जलसंपदा मंत्री गिरीश महाजन यांनी येथे बुधवारी जाहीर केले, तर इस्लामपूरच्या उपजिल्हा रुग्णालयाची श्रेणी वाढवून येथील ट्रामा केअर युनिटसाठी टप्प्या-टप्प्याने निधी देऊ, अशी ग्वाही आरोग्यमंत्री डॉ. दीपक सावंत यांनी दिली. शासनाचा आरोग्य आणि वैद्यकीय शिक्षण विभाग आणि येथील प्रकाश मेडिकल हॉस्पिटलतर्फे आयोजित महाआरोग्य शिबिराचे उद्घाटन महाजन यांच्याहस्ते झाले. यावेळी ते बोलत होते. खा. राजू शेट्टी, खा. संजयकाका पाटील, कृषी राज्यमंत्री सदाभाऊ खोत, नगराध्यक्ष निशिकांत पाटील, डॉ. तात्याराव लहाने, आ. शिवाजीराव नाईक, जिल्हाधिकारी शेखर गायकवाड यांची प्रमुख उपस्थिती होती. महाजन म्हणाले की, शासनाने शस्त्रक्रिया आणि उपचाराचा सर्व खर्च करण्याचा निर्णय घेतला आहे. या महाआरोग्य शिबिरातून शस्त्रक्रिया कराव्या लागणाऱ्या रुग्णांच्या नावे दोन लाख तातडीने वर्ग करण्यात येतात. यापुढे महिला-मुलींमध्ये वाढत असलेल्या स्तनाच्या, छातीच्या कर्करोगाविरुध्द निदान व संपूर्ण मोफत उपचार करणारे विशेष अभियान लठ्ठपणाविरोधी अभियान आणि मूकबधिर सक्षम अभियान राज्यभरात राबवणार आहोत. डॉ. सावंत म्हणाले की, प्रत्येक जिल्हा रुग्णालयात कर्करोग निदान केंद्र सुरू करणार आहोत. इस्लामपूर उपजिल्हा रुग्णालयाची श्रेणी वाढवून येथील ट्रामा केअर युनिटसाठी टप्प्या-टप्प्याने निधी देऊ. संयोजक कृषी राज्यमंत्री खोत म्हणाले की, शासन रुग्णसेवेला प्राधान्य देत ‘डॉक्टर रुग्णाच्या दारी’ अभियान राबवत आहे. मंत्र्यांनी उपजिल्हा रुग्णालयामध्ये ५0 वाढीव कॉटना मंजुरी तसेच ट्रामा केअर युनिटसाठी पाच कोटींचा निधी द्यावा. नगराध्यक्ष निशिकांत पाटील म्हणाले की, शिबिरात १६ हजाराहून अधिक रुग्णांची नोंदणी झाली आहे. चार हजार रुग्णांवर शस्त्रक्रिया करण्यात येणार आहेत. डॉ. राम हंकारे यांनी आभार मानले. यावेळी नगरसेवक विक्रम पाटील, वैभव पवार, गोपीचंद पडळकर, आरोग्य उपसंचालक डॉ. आर. बी. मुगडे, अधिष्ठाता डॉ. पल्लवी सापळे, जिल्हा शल्यचिकित्सक डॉ. अशोक बोल्डे, अजित पाटील, नगरसेवक अमित ओसवाल, शिवसेनेचे जिल्हाप्रमुख आनंदराव पवार, शकील सय्यद, प्रसाद पाटील, डॉ. जयश्री तोडकर, नितीन पाटील, मुख्याधिकारी दीपक झिंजाड, तहसीलदार सविता लष्करे, बाळासाहेब जाधव, भास्कर कदम, रियाज पटेल, धैर्यशील मोरे उपस्थित होते. (वार्ताहर) संजयकाकांना यशाचा कानमंत्र गिरीश महाजन यांनी राजकारणातील यशाचा कानमंत्र दिला. ते म्हणाले की, मी गेली २५ वर्षे आमदार आहे. या काळात दोन लाख रुग्णांवर मोफत उपचार करुन त्यांना सुखरुपपणे घरी पोहोचवले आहे. राजकारणाबरोबर सामाजिक बांधिलकी जोपासा. रुग्णसेवा हा मंत्र जोपासला तर संजयकाका, तुम्ही ५- ७ टर्म तरी हलणार नाही! मंत्री, आमदार-खासदारांचे देहदान अर्ज आ. शिवाजीराव नाईक, खा. संजयकाका पाटील, कृषी राज्यमंत्री सदाभाऊ खोत यांनी देहदान व अवयव दानाचे स्वेच्छा अर्ज मंत्री महाजन व डॉ. सावंत यांच्याकडे सुपूर्द केले. याचवेळी अपघातात ‘ब्रेन डेड’ झालेल्या मुलाचे अवयवदान करणाऱ्या शिवाजी जाधव आणि डॉ. नीलिमा शिंदे यांचा गौरव करण्यात आला.