सांगली : समग्र शिक्षा अभियानांतर्गत सध्या शाळांची राष्ट्रीयीकृत बँकांमध्ये खाती सुरू असून, ती दुसऱ्या राष्ट्रीयीकृत बँकेत उघडण्यासाठी सक्ती करण्यात येऊ नये, तसेच प्रत्यक्ष शाळा सुरू असल्याने लसीकरणासह कोविड कामकाजावरील शिक्षकांचे सर्व आदेश रद्द करण्यात यावेत, अशी मागणी शिक्षक समितीचे जिल्हाध्यक्ष बाबासाहेब लाड यांनी प्राथमिक शिक्षणाधिकारी विष्णू कांबळे यांच्याकडे केली आहे.
शिक्षक समितीचे जिल्हाध्यक्ष तथा शिक्षण समितीचे सदस्य बाबासाहेब लाड, मिरज तालुका अध्यक्ष सुरेश नरुटे, सरचिटणीस प्रकाश कलादगी, विकास चौगुले, दिलीप पाटील, शंकर भोसले यांनी प्राथमिक शिक्षणाधिकारी कांबळे यांच्या सोबत शिक्षण आणि शिक्षकांच्या प्रश्नावर चर्चा केली.
यावेळी लाड यांनी समग्र शिक्षा अभियानांतर्गत शाळांची राष्ट्रीयीकृत बँकांमध्ये खाती सुरू आहेत, ती बंद करून बँक ऑफ महाराष्ट्र शाखेत खाते उघडण्यासाठी महाराष्ट्र प्राथमिक शिक्षण परिषदेच्या दि. २२ जून २०२१ परिपत्रकानुसार जिल्हा प्रशासनाने महाराष्ट्र बँकेत नव्याने शाळांची खाती उघडण्यासाठी सूचना दिली आहे. याचा मुख्याध्यापकांना नाहक त्रास होत आहे. फक्त जत तालुक्यात सहा शाखा असून, शिराळा, खानापूर या तालुक्यांत प्रत्येकी एक शाखा आहे. आटपाडी, वाळवा, मिरज, तासगाव, पलूस तालुक्यांत प्रत्येकी दोन शाखा आहेत. त्यामुळे वाडी-वस्तीवरील, खेड्यातील शाळा प्रमुखांना गरज नसताना सुरू असणारी बँक खाती बंद करून प्रशासनाने एकाच बँकेत खाती उघडण्यासाठी सक्ती करू नये, अशी विनंती केली आहे. जिल्ह्यातील शाळा विद्यार्थी उपस्थितीसह नियमित सुरू असल्याने माध्यान्ह भोजन सुरू करणे, शिक्षकांना कोविड कामकाजातून मुक्त करण्यासह अन्य प्रलंबित प्रश्नांबाबत विस्तृत चर्चा केली. मुख्याध्यापक पदोन्नतीमुळे शिक्षकांचे समायोजन करणे, कन्नड विभागातील वरिष्ठ मुख्याध्यापक, केंद्रप्रमुख यांची रिक्त पदे भरणे, ऑगस्ट २०१४ मधील नियुक्त विषय शिक्षकांना रुपये ४३०० ग्रेड वेतन लागू करणे इत्यादी प्रश्नांबाबत शिक्षणाधिकाऱ्यांशी सकारात्मक चर्चा झाल्याचेही लाड यांनी सांगितले.
यावेळी शिक्षक नेते किरण गायकवाड, सयाजीराव पाटील, शशिकांत भागवत, जिल्हा सरचिटणीस दयानंद मोरे, सतीश पाटील, कार्यकारी अध्यक्ष उद्धव शिंदे, कोषाध्यक्ष माणिक पाटील, शिक्षक बँकेचे अध्यक्ष यू. टी. जाधव, राजाराम सावंत, शिवाजी पवार, शशिकांत बजबळे, सुनील गुरव, महादेव माळी, श्रेणिक चौगुले आदी उपस्थित होते.