"गाडी चुकली नाहीतर मंत्रिमंडळात असते", ठाकरेंच्या आमदारासाठी एकनाथ शिंदेंची सभा, सर्वांसमोर दिली ऑफर

जिल्हा परिषद निवडणुकांसाठी उपमुख्यमंत्री एकनाथ शिंदे सभा घेत आहेत. बार्शीत शिंदेंनी उद्धवसेनेचे आमदार दिलीप सोपल यांच्यासाठी सभा घेतली.  यावेळी शिंदेनी सोपलांना थेट ऑफर दिली. 

"खाते कोणाचे पण असले तरी मी उपमुख्यमंत्री आहे, टेन्शन घेऊ नका. टेन्शन द्यायचे. दिलीप सोपल ७ वेळा निवडून आले. ८व्यांदा निवडून येतील. मागच्या वेळी झालेली चूक दुरुस्त करू. सोपल साहेबांचा मान सन्मान राखला जाईल. तुम्ही आमच्यासोबत या लगेच कारखाना सुरू करू", असे सांगत उपमुख्यमंत्री एकनाथ शिंदे यांनी उद्धवसेनेचे आमदार दिलीप सोपल यांना सभेतच ऑफर दिली. 

जिल्हा परिषद आणि पंचायत समिती निवडणुकीची रणधुमाळी सुरू आहे. बार्शीमध्ये दोन्ही शिवसेना एकत्र आल्या आहेत, पण कोणत्याही नेत्यांकडून याबद्दल खुलासा करण्यात आलेला नाही. अशातच उद्धवसेनेचे आमदार दिलीप सोपल यांच्यासाठी उपमुख्यमंत्री एकनाथ शिंदे यांनी सभा घेतली. 

उपमुख्यमंत्री शिंदे म्हणाले, "दिलीप सोपल यांचे काम अनेकवर्षे विधानसभेत पाहिले आहे. दोन वेळा सभागृहात ते नव्हते, तरीही सभागृहाला चुकल्यासारखे वाटले. ते सर्वांचे मित्र आहेत. १९९५ मध्ये मंत्री होते. कामाचा माणूस आहे."

"दुःखाचे सावट आहे. उपमुख्यमंत्री अजित पवार यांच्या जाण्याने राज्यात दुःख आहे. पण, ही कार्यकर्त्यांची निवडणूक आहे. आमच्या निवडणुका झाल्या. हे कार्यकर्ते आहेत, जे आम्हाला निवडून देतात. कार्यकर्त्याला अपेक्षा असतात की नेता आपल्याजवळ आला पाहिजे. कार्यकर्त्याच्या पाठीशी उभा राहणारा मी माणूस आहे. सोपल मनापासून दोस्ती करतात म्हणून मी या ठिकाणी आलो आहे", असे शिंदे म्हणाले. 

"लोक अजूनही बोलतात की लाडकी बहीण योजना बंद करणार. मी गरिबी पाहिली आहे. त्यामुळे मला गरिबीची जाण आहे. कोणी मायका लाल आला तरी लाडकी बहीण योजना बंद होणार नाही. शेतकरी अन्नदाता आहे. त्याला केंद्रबिंदु ठेवून आम्ही काम करतोय. कर्जमाफीचे आश्वासन दिले आहे. समितीचा अहवाल आला की कर्जमाफी करणार", असे शिंदेंनी सांगितले. 

"बार्शीच्या विकासासाठी निधीची कमतरता भासू देणार नाही. दिलीप सोपल ७ वेळा आमदार झाले. त्यांची गाडी चुकली नाहीतर ते मंत्रिमंडळात असते. तुम्ही आमच्यासोबत या. लगेच संतनाथ कारखाना सुरू करू. मी जे बोललोय, त्यातील एक शब्दही इकडचा तिकडे होणार नाही", असे शिंदे म्हणाले.