Sangli Crime: झरेतील जिल्हा बँकेवर दरोडा टाकणारी टोळी जेरबंद, सव्वातीन कोटींचा मुद्देमाल जप्त

बांबवडेच्या तरुणाने टीप दिल्याने टोळी दाखल

सांगली : झरे (ता. आटपाडी) येथील जिल्हा मध्यवर्ती बँकेचे लॉकर गॅस कटरने कापून दागिने लुटणाऱ्या टोळीला स्थानिक गुन्हे अन्वेषणच्या पथकाने जेरबंद केले. राहुल रंजमीश शर्मा (वय २७, रा. ककराला, जि. बदायू, उत्तर प्रदेश), विश्वजित विजय पाटील (२४, रा. बांबवडे, ता. पलूस), संकेत अरुण जाधव (२६, रा. बलवडी, ता. खानापूर), इजाज राजू अत्तार (३०, रा. आमणापूर, ता. पलूस) या चौघांना अटक करून सोन्या-चांदीचे दागिने, जीप, गावठी पिस्तूल, असा सव्वातीन कोटींचा मुद्देमाल जप्त केला.जिल्हा बँकेच्या झरे शाखेत ७ जानेवारी रोजी रात्री खिडकीची काच फोडून चोरट्यांनी आतमध्ये प्रवेश केला. त्यानंतर आतील २२ सेफ डिपॉझिट लॉकर कटरने तोडून ग्राहकांनी ठेवलेले सोन्या-चांदीचे दागिने व रोकड चोरट्यांनी चोरून नेली. विशेष पोलिस महानिरीक्षक सुनील फुलारी यांनी हा गुन्हा उघडकीस आणण्यासाठी सूचना दिल्या होत्या. अधीक्षक संदीप घुगे, अपर पोलिस अधीक्षक कल्पना बारवकर यांनी घटनास्थळी भेट देऊन माहिती घेतली होती. स्थानिक गुन्हे अन्वेषणचे निरीक्षक संजीव झाडे यांना गुन्हा उघडकीस आणण्याबाबत आदेश दिले होते. त्यानुसार गुन्हे अन्वेषणचे सहायक निरीक्षक पंकज पवार व सहायक निरीक्षक जयदीप कळेकर यांची दोन पथके चोरट्यांच्या मागावर होती.चोरट्यांनी बँकेतील सीसीटीव्हीचा डीव्हीआरही नेला होता. तपास सुरू असतानाच पलूस येथे एका लॉजवर सात-आठ दिवसांपासून उत्तर प्रदेशातील काहीजण उतरल्याची माहिती मिळाली. पोलिसांनी तेथे जाऊन तपास केला. तेव्हा विश्वजित पाटील याचे उत्तर प्रदेशात गलाई दुकान होते. तेथील सराफ दुकानदार राहुल शर्मा साथीदारांना घेऊन आला होता. त्यांना संकेत जाधव, इजाज अत्तार यांनी चोरी करण्यासाठीचे साहित्य पुरविल्याचे समजले. पोलीसांनी उत्तर प्रदेशातील ककराळा येथे जाऊन शर्माला सोन्याच्या लगडसह ताब्यात घेतले. त्यानंतर संशयित विश्वजित पाटील, संकेत जाधव, इजाज अत्तार यांना सांगलीवाडीमधून ताब्यात घेतले. पोलिसांनी १ कोटी ५७ लाख ६८ हजारांची सोन्याची लगड, २८ किलो ५०० ग्रॅम चांदीचे दागिने, मूर्ती, ७० लाखांचे सोन्याचे दागिने, १० लाखांची जीप, गावठी कट्टा, रोख ५१ हजार ६०० रुपये, गॅस सिलिंडर असा ३ कोटी २५ लाख, ५४ हजारांचा मुद्देमाल जप्त केला आहे.गुन्हे अन्वेषणचे सागर लवटे, संदीप नलावडे, सागर टिंगरे, रणजित जाधव, अमिरशा फकीर, नागेश खरात, अनिल कोळेकर, अतुल माने, सोमनाथ गुंडे, सतीश माने, मच्छिंद्र बर्डे, दरिबा बंडगर, संदीप गुरव, उदय माळी, अमर नरळे, महादेव नागणे, अरुण पाटील, अमोल कदम, अमोल लोहार, प्रमोद साखरपे, सुनील जाधव, सूरज थोरात, केरुबा चव्हाण, विक्रम खोत, रोहन घस्ते, अभिजित ठाणेकर यांच्या पथकाने कारवाई केली.

चोरीचे सोने वितळवलेसंशयित राहुल शर्मा याचे सराफी दुकान आहे. त्याने सोने चोरून नेल्यानंतर ते वितळवले होते. पोलिसांनी त्याच्याकडून १ किलो १६८ ग्रॅम वजनाची १ कोटी ५७ लाख ६८ हजार रुपयांची सोन्याची लगड जप्त केली.

आणखी सात संशयित पसारगलाई कामगार विश्वजित पाटील याने टीप दिल्यानंतर राहुल शर्मा हा उत्तर प्रदेशातून सात साथीदारांना घेऊन पलूस येथे उतरला होता. चोरी केल्यानंतर सर्वजण पसार झाले. राहुलला अटक केल्यानंतर बाकीचे सात संशयित पसार झाले आहेत. ते रेकॉर्डवरील असून त्यांचा शोध सुरू आहे.