कुपवाड : शहरातील मुख्य कुपवाड विकास सोसायटी चौकात विनाकारण फिरणाऱ्या ११६ नागरिकांची गुरुवारी अँटिजेन टेस्ट करण्यात आली. या तपासणीत तीन नागरिक पॉझिटिव्ह मिळून आले आहेत.
महापालिका आणि कुपवाड पोलीसांनी संयुक्तपणे कारवाई केली. सहायक आयुक्त दत्तात्रय गायकवाड आणि महापालिकेचे वैद्यकीय अधिकारी मयूर औंधकर यांच्या नेतृत्वाखालील पथकाने शहरामधील ११६ नागरिकांची गुरुवारी अँटिजेन टेस्ट केली. या तपासणीमध्ये तीन नागरिकांचे रिपोर्ट कोरोना पॉझिटिव्ह आले आहेत. यातील एक रुग्ण महापालिका क्षेत्रातील असून बाकीचे दोघे ग्रामीण भागातील असल्याची माहिती गायकवाड यांनी दिली.
महापालिका हद्दीतील आणि ग्रामीण भागातील रुग्णांना होम आयसोलेशन केले आहे. महापालिका आणि कुपवाड पोलीस ठाण्याच्या संयुक्त पथकामध्ये सहायक आयुक्त गायकवाड यांच्याबरोबर सहायक पोलीस निरीक्षक नीरज उबाळे, उपनिरीक्षक राजू अन्नछत्रे, डॉ. मयूर औधकर, डॉ अंजली धुमाळ आदींसह आरोग्य सेवकांनी सहभाग घेतला होता.
चौकट
आरोग्य विभागाचे फिरते पथक तयार
महापालिका आरोग्य विभाग आणि कुपवाड एमआयडीसी पोलीस ठाण्याचे फिरते पथक तयार केले जाणार आहे. हे पथक शहर परिसरात फिरणार आहे. या पथकाकडून रस्त्यावर व चौकात विनाकारण बसलेल्यांची जागेवरच अँटिजेन तपासणी करणार आहे. त्यामुळे रस्त्यावर विनाकारण फिरणाऱ्यांवर निश्चितपणे आळा बसेल, अशी माहिती गायकवाड यांनी दिली.