विस्तार अधिकाऱ्याचा शिक्षकावर हल्ला

संतापजनक प्रकार : दापोली तालुक्यातील कादिवलीतील घटना

दापोली : तालुक्यातील शिक्षण विस्तार अधिकारी नंदलाल शिंदे यांनी कादिवली शाळेतील शिक्षक सुशीलकुमार पावरा यांना सुरीने वार केले. त्यांना ठार मारण्याची धमकीही दिली, अशी तक्रार दापोली पोलीस स्थानकात दाखल झाली आहे. या घटनेने खळबळ उडाली आहे.कादिवली शाळेत उपशिक्षक असणारे सुशील पावरा यांनी आपली काही महत्त्वाची कागदपत्रे शिक्षण विभागाकडून गहाळ झाल्याची तक्रार केली होती. ती परत मिळण्यासाठी त्यांनी माहितीच्या अधिकारात मागणी केली होती. मात्र, तत्कालीन प्रभारी गटशिक्षणाधिकारी नंदलाल शिंदे यांनी वेळीच माहिती दिली नाही. त्यामुळे पावरा यांनी शिंदे यांची तक्रार वरिष्ठांकडे दिली. त्या रागातून शिंदे यांनी पावरा यांना यापूर्वी धमकी व दमदाटी केली होती. त्यामुळे हताश होऊन माहिती मिळवण्यासाठी पावरा यांनी आयुक्तांकडे अपील केले होते. त्याचा निकाल आपल्या बाजूने लागल्याचे पावरा यांचे म्हणणे आहे.
हा राग मनात धरून शुक्रवारी सकाळी ८ च्या सुमारास शिक्षण विस्तार अधिकारी नंदलाल शिंदे शाळेत आले. त्यावेळी आपण मुलांना शिकवित होतो. ते वर्गात येऊन आपल्याशी वाद घालत आरडाओरड सुरू केला. हा प्रकार पाहून मुले घाबरून गेली. काही मुले हा प्रकार पाहून रडायला लागली. आपल्याला गेटआऊट म्हणत धारदार सुरी घेऊन ते आपल्या अंगावर धावून आले. बचावासाठी आपण सुरीचा धारेचा भाग हातात धरला असता शिंदे यांनी सुरी ओढली. त्यामुळे आपल्या हाताच्या बोटाला जखम झाली असल्याचे पावरा यांनी आपल्या तक्रारीत म्हटले आहे.
घटनेनंतर काही वेळातच शाळेच्या तपासणीकरिता विस्तार अधिकारी शिंदे यांच्यासह केंद्रप्रमुख शीतल गिम्हवणेकर, शिरसाट, मुख्याध्यापक खांबल त्या वर्गात आले. हा प्रकार पाहिल्यावर त्यांनी आपल्याला उपचाराकरिता रुग्णवाहिकाद्वारे उपजिल्हा रुग्णालयात पाठवले, असेही त्यांनी म्हटले आहे.
दापोली पंचायत समिती शिक्षण विभागात पावरा व शिंदे यांचा वाद गेली दोन वर्षे सुरू आहे. शिंदे पदाचा वापर करून पावरा यांना वारंवार त्रास देत असल्याच्या घटना गेली दोन वर्षे घडत आहेत. पावरा यांना जाणून बुजून त्रास देण्यात येत असून, आजसुद्धा मनात राग धरूनच ते गेले होते. याबाबत दापोली पोलीस ठाण्यात तक्रार दाखल झाली असून, या घटनेचा तपास हेड कॉन्स्टेबल वीरेंद्र घाणेकर करीत आहेत. (प्रतिनिधी)

आपण यापूर्वी नंदलाल शिंदे यांच्याविरुद्ध पोलीस ठाण्यात तक्रार दिली होती. तसेच माहिती अधिकारात त्यांच्याकडे माहिती मागितली असता ती न दिल्याने आयुक्तांकडे अपील केले होते. एका महिन्यात जिल्हा परिषद मुख्य अधिकारी यांनी या संदर्भात चौकशी करून अहवाल देण्याच्या सूचना आयुक्तांनी दिल्या होत्या. याचा राग मनात धरून आपल्याला त्रास देण्याच्या हेतूने त्यांनी हत्याराने मारण्याचा प्रयत्न केला असल्याचे पावरा यांनी तक्रारीत म्हटले आहे.