ZP Election 2026 : मतदार यादीतील घोळ; नीरावागज गणात ६५० मतदार वंचित

- या बदलामुळे मतदार यादी तयार करताना प्रशासनाची दिशाभूल झाल्याची शक्यता ग्रामस्थांकडून व्यक्त करण्यात येत आहे.

सांगवी : जिल्हा परिषद व पंचायत समिती निवडणुकीदरम्यान बारामती तालुक्यातील नीरावागज–डोर्लेवाडी गट व नीरावागज गणातील पाहुणेवाडी येथे मोठा गोंधळ उघडकीस आला आहे. वॉर्ड क्रमांक १ मधील तब्बल ६५० मतदारांची नावे मतदार यादीतून वगळली गेल्याचा आरोप ग्रामस्थांनी केला असून, त्यामुळे संबंधित मतदारांना मतदानापासून वंचित राहावे लागल्याची तीव्र नाराजी व्यक्त केली जात आहे.

माळेगावचे नुकतेच नगरपंचायतीत रूपांतर झाले असून, कारखाना क्षेत्रातील काही भाग पाहुणेवाडी हद्दीत आला आहे. या बदलामुळे मतदार यादी तयार करताना प्रशासनाची दिशाभूल झाल्याची शक्यता ग्रामस्थांकडून व्यक्त करण्यात येत आहे. सायंकाळी साडेपाच वाजेपर्यंत पाहुणेवाडीत केवळ ५३ टक्के मतदान झाले. ज्यांची नावे मतदार यादीत नव्हती, असे अनेक मतदार मतदान केंद्रावर येऊन निराश होऊन माघारी परतले.

विशेष म्हणजे याच वॉर्डमध्ये माळेगाव सहकारी साखर कारखान्याचे माजी चेअरमन व विद्यमान संचालक बाळासाहेब तावरे यांचेही मतदान असल्याची माहिती समोर आली आहे. प्रशासनाकडून प्रारूप मतदार यादी दिल्याचे सांगण्यात येत असले, तरी ती यादी ग्रामस्थांना प्रत्यक्ष दाखवून प्रसिद्ध करणे व हरकती मागविणे ही ग्रामसेवक व तलाठी यांची जबाबदारी होती. मात्र त्यांनी ही प्रक्रिया योग्यरीत्या न राबवल्याचा आरोप नागरिकांनी केला आहे.

“६५० नव्हे, तर सुमारे २०० ते २५० मतदारांची नावे येथेच आहेत. विधानसभेला माळेगाव केंद्र होते, तर जिल्हा परिषदेसाठी विधानसभा केंद्रे जशीच्या तशी घेतली आहेत. ३२० मतदारांची यादी मोठी असल्याने एका केंद्राचे दोन केंद्र करण्यात आले. माळेगाव नगरपंचायत झाल्यानंतर ज्यांची नावे यादीत आली नाहीत, त्यांनी प्रशासनाच्या निदर्शनास आणून देणे आवश्यक होते.” - नीलम देशमुख, तलाठी (माळेगाव बु.)

“तालुक्यात दोन ठिकाणी आक्षेप नोंदविण्यात आले होते व तेथे आवश्यक दुरुस्त्या करण्यात आल्या. या भागात मतदार यादी प्रसिद्ध झाल्यानंतर कोणतीही हरकत घेण्यात आलेली नाही. उमेदवारी अर्ज भरण्याच्या शेवटच्या दिवसापर्यंत मतदार यादी दुरुस्त करता येत होती. मात्र त्या मुदतीत आक्षेप न घेतल्याने आता बदल शक्य नाही. पुढील वेळी यादी ‘अपडेट’ करता येईल.” - स्वप्नील रावडे, सहायक निवडणूक निर्णय अधिकारी